Rugende FC yikuye muri shampiyona imburagihe

Rugende FC ibarizwa mu Karere ka Gasabo, yamanitse ibiganza yemera ko itazakomeza gukina shampiyona kubera ko amikoro ari macye. Rugende FC iyi shampiyona yatangiye igenza akaguru kamwe dore ko yari yaragurishije abakinnyi bayo benshi mu cyiciro cya mbere mu makipe nka Etoile de L'Est na Gicumbi FC.

Mu mpera z'umwaka wa 2021 iyi kipe yari yarasezeye muri shampiyona ariko iza kugaruka kubera ko yabonaga bigishoboka ko yakomeza shampiyona mu gihe yaba isubukuwe. Impamvu yari yateye Rugende FC gusezera, ni abakinnyi bayo batari bafite inkingo kandi shampiyona ikinwa n'abakinnyi bakingiye.

Shampiyona y'icyiciro cya kabiri irasubukurwa hanikwa umunsi wa 10 aho Rugende FC yagombaga gukina na Rwamagana City. Rugende FC Kandi yari ifite umukino w'ikirarane na Nyanza FC wagombaga kuba tariki ya 02 Gashyantare uyu mwaka, ukabera ku kibuga cya Rugende.

Amakuru ava muri iyi kipe avuga ko ubwo imikino yasubukurwaga bakoresheje inama bafata umwanzuro wo kwikura muri shampiyona kubera ubushobozi budahagije.

Itegeko rivuga ko iyo ikipe yikuye muri shampiyona itarangiye, iyo ishatse kugaruka ihera mu byiciro byo hasi, ariko mu Rwanda nta kindi cyiciro kiba munsi y'icya kabiri. 

Email FERWAFA yandikiye amakipe y'ikiciro cya kabiri