Harmonize yakiriye Bruce Melodie yise 'umuvandimwe’ aririmba mu gitaramo yamurikiyemo album-VIDEO

Uyu muhanzi wakunzwe mu ndirimbo zitandukanye zirimo 'Matatizo', yakoreye igitaramo cy’amateka ahitwa Palm Village Mikocheni mu ijoro ry’uyu wa Gatanu tariki 31 Ukuboza 2021, rishyira kuri uyu wa Gatandatu tariki 1 Mutarama 2022.

Yamurikaga Album ye ya kabiri yise ‘High School’. Mbere yo gutangaza iyi Album, yifashishije imbuga nkoranyambaga ze, yifurije abafana be n’abakunzi b’umuziki umwaka mushya muhire wa 2022, abashimira kumushyigikira mu muziki nka ‘Kondeboy’.

Uyu muhanzi yavuze ko ibi ari igisobanuro cy’urugendo rushya mu muziki we. Album iriho indirimbo 20 nka 'Sorry', Outside, Serious Love, Always, Why na Sarkodie, Turn Up, Mtaje, Usia, Dunia, Mdmo na Ibrah, Influencer, Mood na Naira Marley, Single, What do yo mis na Anjella, I cant stop, One Question, Sandakalawe na Busiswa, Muziki, Kamaliza na Sholo Mwamba ndetse na Teacher.

Muri iki gitaramo, Harmonize yaririmbye indirimbo zinyuranye zirimo n’iziri kuri iyi Album. Yari afite abaririmbyi n’abacuranzi bamufashije gutanga ibyishimo, ariko yanyuzagamo akanaganiriza abitabiriye iki gitaramo ku kubakira ku bufatanye mu gutezanya imbere.

Avuga ko umuziki n'ibindi kugira ngo bitere imbere muri Tanzania no mu Karere k'Afurika y'Iburasirazuba, bisaba gushyigikirana mu nguni zose z'ubuzima.

Avuga ko umwaka wa 2021 yakoze akazi gakomeye kandi ko ntawabihakana, ashimangira ko mu 2022 abantu bakwiye kumwitega.

Yabwiye abitabiriye igitaramo cye, ko yishimiye kwakira umuvandimwe we Bruce Melodie.  Ati "Bagore namwe bagabo, ngiye kubazanira umuvandimwe wanjye wo mu Rwanda. Bavandimwe mwiteguye umuvandimwe wanjye ni Bruce Melodie!

Bruce Melodie yageze ku rubyiniro ahoberana na Harmonize, maze yanzika mu ndirimbo ye yise ‘Katerina’ yabaye idarapo ry’umuziki we mu Karere k’Afurika y’Iburasirazuba.

Uyu muhanzi yaririmbye iyi ndirimbo, Harmonize amufasha kuyiririmba ari nako abyina, bikazamura amarangamutima y’abitabiriye iki gitaramo nabo bamufashaga kuyiririmba.

Harmonize wabonaga ko yishimiye Bruce Melodie, ndetse abacuranzi be n'abaririmbyi be bamufashije gususurutsa abantu. 

Mu minota ya nyuma y’iyi ndirimbo, Bruce Melodie yasabye abari mu gitaramo gufatanya nawe kuyiririmba, asoza ashima Harmonize avuga ko ari muri Tanzania mu kumushyigikira.

Mu birori bya ‘The Choice Awards Gala Night’, byabaye ku wa 15 Ukuboza 2021, Bruce Melodie yemeje ko yakoranye indirimbo n’umunya-Repubulika Iharanira Demokarasi ya Congo (RDC) Koffi Olomidé, n’umunya-Tanzania Harmonize.

Ahamya ko kuri ubu kuba umuhanzi wo mu Rwanda yakorana indirimbo n’umuhanzi Mpuzamahanga atari ikintu gikwiye gutungura abantu, kuko umuziki w’u Rwanda umaze kugera ku rwego rwiza kandi rushimishije.

Akavuga ko Koffi na Harmonize ari bo bateye intambwe bamusaba ko bakorana indirimbo. Ati “Koffi yarampamagaye, Harmonize arampamagara bose bansaba ko dukorana imirimo.”

Akavuga ko ashingiye ku mishinga y’indirimbo ari gukora n’imishinga abandi bahanzi bagenzi be bafite, abafana batazicwa n’inyota mu mwaka wa 2022.

Bruce ati “Mbega umwaka wa 2022 unteye ubwoba [Akubita agatwenge] nyine harimo ibikorwa byinshi kandi by'abahanzi benshi sindi kuvuga kuri njye gusa, icyo nashishikariza abafana b'umuziki nyarwanda bahame hamwe. Umunyamahanga n'umunyarwanda bagiye kujya ku rwego rumwe cyangwa umunyarwanda ajye no hejuru.”

KANDA HANO UREBE UKO BRUCE MELODIE YARIRIMBYE MU GITARAMO CYA HARMONIZE

">