Menya byinshi ku munsi wa Boxing Day ukurikira Noheli, Ese kwitwa gutya byakomotse he?

Uyu munsi wa Boxing Day ukurikira Noheli ufatwa nk’umunsi w’ikiruhuko mu bihugu bimwe na bimwe cyane cyane ibibarizwa mu muryango w’ibihugu bivuga icyongereza 'Commonwealth'. Amakuru avuga ko uyu munsi ufite inkomoko mu Bwami Bw’Abongereza.

Mu kinyarwanda wakumva uyu munsi ufitanye isano n’iteramakofi, ariko siko bimeze kuko hari zimwe mu mpamvu zishingirwaho bemeza icyatumye uyu munsi witwa “Boxing Day ".

Ese uyu munsi kwitwa Boxing Day byaturutse kuki?

Ingingo ya mbere ni uko iri zina ryaturutse mu Bwami bw’Abongereza mu myaka 1830s ubwo ku munsi wa mbere ukurikira umunsi mukuru wa Noheli, yari italiki ya mbere amaposita yatangiraga kuzanira abakiliya bayo ibyo babaga boherejwe bije mu makarito (Boxes).

Ingingo ya kabiri bikekwa ko yaturutseho izina ry’uyu munsi wa Boxing Day, ni ivuga ko mu bwami bw’Abongereza nyuma y’umunsi mukuru wa Noheli habaga igikorwa cyo gukusanya inkunga yo gufasha abatishoboye bigakorwa hakusanywa amafaranga akusanyirizwa mu gikarito (Box).

Indi ngingo nayo ifitanye isano n’umuco w’Abongereza aho mu myaka yo hambere muri ubu bwami habaga igikorwa cyo gushimira abacuruzi bahabwa impano za noheli zipfunyitse mu bikarito ndetse n’amafaranga, ibyo bigakorwa ku munsi ukurikira Noheli.

Hari abandi nabo bavuga ko uyu munsi waba ufitanye isano nuko mu bihe byo hambere ubwo imiryango ikize ku mugabane w’Uburayi ku munsi ukurikira Noheli yafataga umwanya igatanga impano ku bakozi bayo. Izo mpano zikaba zaratangwaga zipfunyitse mu bikarito.

Ese uyu munsi wizihizwa gute hirya no hino ku isi?

Kuri uyu munsi abantu bo hirya no hino ku Isi bahura n’inshuti zabo ndetse bakajya no mu birori bitandukanye harimo no kujya kureba imikino itandukanye by'umwihariko umupira w’amaguru na Basketball. Mu gihugu cy’u Bwongereza muri shampiyona yaho y’icyiciro cya mbere 'Premier League' buri mwaka kuri uyu munsi wa Boxing Day haba umunsi w’imikino wahariwe uyu munsi.

Uyu munsi kandi abantu bahana impano zitandukanye ndetse bamwe bakawita umunsi wahariwe guhaha ‘Shopping Holiday’. Mu bihugu bimwe na bimwe habaga ibirori byo kwizihiza uyu munsi ariko bitewe n’icyorezo cya COVID-19 cyugarije Isi hamwe na hamwe ibi birori byagiye bihagarikwa.