Ahabanza Utuntu nutundi

Abashakashatsi bavumbuye umubumbe utangaje aho umwaka umara amasaha 8 gusa!

Yanditswe na: Soter Dusabimana
Taliki:8/12/2021 12:27 0

Abashakashatsi mu by’isanzure bavumbuye umubumbe ujya kungana n’umubumbe wa Mars, aho kuri uyu mubumbe umwaka waho umara amasaha 8 gusa. Ivumburwa ry’uyu mubumbe abashakashatsi bavuze ari intambwe ya mbere itewe mu kuvumbura isi ya kabiri.

Abantu benshi hano ku isi bakunda kuvuga ngo ibihe birihuta, ariko ibaze ugize amahirwe yo kugera ku mubumbe witwa GJ 367b aho ushobora kuryama amasaha umunani ugakanguka umwaka urangiye uri mu buriri.

Uyu mubumbe wavumbuwe n’abashakashatsi mu by’isanzure witwa GJ 367b uri mu bwoko bw’imibumbe izwi nka exoplanet, iyi ikaba imibumbe izenguruka inyenyeri aho kuzenguruka izuba nk’iyindi mibumbe isanzwe iri mu itsinda ry’imibumbe n’isi dutuye irimo.

Abavumbuye uyu mubumbe bavuze ko uherereye ku ntera ya (31 light years) uvuye ku isi. Light year, ibi bikaba ibipimo bikoreshwa mu gupima intera iri mu isanzure. Kugira ngo ubyumve neza 1 light year ingana na kilometero trillion 9.46 (9.6 x10¹²km).

GJ 367b ni umubumbe abashakashatsi bavuze ko ugizwe n’ibitare ndetse ukaba ujya kungana n’umubumwe wa Mars, ukaba ujya kugira imiterere imeze nkuyu mubumbe wa Mercury uri mu itsinda ry’imibumbe izenguruka izuba.

Ubushyuhe kuri uyu mubumbe bugera kuri 1500 degrees Celcius, ubu bushyuhe bukaba buhagije ngo ibyuma bishonge-ibi bikaba byerekana ko ikiremwamuntu bitashoboka ko cyahatura.

Kuri GJ 367b umwaka umara amasaha 8 gusa

Ikigo cy’Abadage gikora ubushakashatsi mu by’isanzure cyatangaje ko uyu mubumbe wavumbuwe mu mwaka 2019 bahereye ku makuru bahawe n’ikigo cy’Abanyamerika (NASA). Ikindi wamenya kuri uyu mubumbe nuko ufite cyimwe cya kabiri cy’uburemere bw’umubumbe wacu, ibi bigatuma uyu mubumbe wa GJ 367b uba uwambere ufite uburemere bucye mu mibumbe yo mu bwoko bwa exoplanet 5,000 imaze kuvumburwa.

Kristine Lam umwe muri aba bashakashatsi bo mu kigo cy’abadage gikora ubushakashatsi mu by’isanzure yavuze ko kuvumbura uyu mubumbe ari ntambwe ya mbere itewe mu gushakisha indi si ya kabiri.

Mu mwaka 2015, ikigo cy’Abanyamerika gikora ubushakashatsi mu by’isanzure (NASA) giherutse gutangaza ko cyavumbuye umubumbe ufite imiterere ijya kumera nkuy’umubumbe wacu. Uyu mubumbe wiswe Kepler-452b, NASA yavuze ko ahantu uherereye hashobora guturwa. Aho uyu mubumbe uherereye icyogajuru kigendera ku muvuduko wa 59,000 km/h byasaba nibura imyaka miliyoni 30 kuhagera.