Dani Alves yahawe nimero yambawe na Iniesta muri FC Barcelona – AMAFOTO

Kuri uyu wa gatatu tariki ya 17 Ugushyingo 2021, nibwo ikipe ya FC Barcelona yerekanye ku mugaragaro myugariro w’iburyo Dani Alves uheruka kuyigarukamo avuye iwabo muri Brazil, iki gikorwa kikaba cyabereye i Camp Nou.

Alves yahawe nimero umunani yari ibitse nyuma y’uko umunya Bosnia Miralem Pjanić wayambaraga yerekeje muri Beşiktaş yo muri Turikiya, iyi nimero y’amateka akomeye muri FC Barcelona yambawe n’umunyabigwi Andrés Iniesta wahesheje iyi kipe ibikombe 30 ubwo yayikiniraga.

Dani Alves yumvikanye na FC Barcelona kuyikinira kugeza uyu mwaka w’imikino urangiye, nyuma hakaba harebwa uko yakongera amasezerano bigendanye n’uburyo azaba yitwaye.

Uyu mukinnyi watangiye imyitozo muri iyi kipe ye nshya muri iki cyumweru, gusa azemererwa kuyikinira muri Mutarama isoko ryo kugura abakinnyi ryongeye gufungura.

Alves wageze muri Barcelona bwa mbere mu 2008 avuye muri Sevilla, yayisohotsemo mu 2016 ayikiniye imikino 391 izwi, aho yayitsindiye ibitego 23.

Mu 2016, Alves yavuye muri Barcelona yerekeza muri Juventus, yavuyemo yerekeza muri Paris Saint-Germain, nayo aza kuyisohokamo yerekeza iwabo muri São Paulo mbere yo kugaruka muri Barcelona.

Dani Alves amaze guhesha ikipe y’igihugu cye ibihembo bitandatu bitandukanye, igiheruka akaba ari umudali wa zahabu aherutse kwegukana mu mikino Olempike yabereye i Tokyo.

Dani Alves yahesheje FC Barcelona ibikombe 23 mu myaka 8 yayikiniye, birimo Laliga 6, Copas del Rey 4, Champions League 3, Club World Cups 3, Spanish Super Cups 3, European Super Cups 4.

Uyu mukinnyi kandi yahesheje Juventus ibikombe (2), Paris Saint-Germain (6) and São Paulo (1) mbere yo kugaruka i Catalonia. Yanahesheje kandi EC Bahia (3), Sevilla (5) and Brazil (6).

Muri rusange Dani Alves amaze kwegukana ibikombe 46 bitandukanye, bimugira umwe mu bakinnyi bafite amateka akomeye ku Isi.

Dani Alves yahawe nimero 8 muri FC Barcelona

Alves yishimiye kugaruka mu ikipe y'amateka mu buzima bwe