BePawa
Kigali

Umukinnyi wa PSG yatawe muri yombi ashinjwa kugambanira mugenzi we wakubiswe akagirwa intere

Yanditswe na: SAFARI Garcon
Taliki:10/11/2021 18:14
0


Ikipe ya Paris Saint Germain y’abagore yemeje ko umukinnyi wayo, Aminata Diallo ari mu maboko ya Polisi akaba akurikiranyweho kugambanira mugenzi we bakinana, Kheira Hamraoui wakubiswe n’abantu bataramenyekana akagirwa intere.



Ikinyamakuru l’Equipe cyandikirwa mu Bufaransa, mu gitondo cyo kuri uyu wa Gatatu tariki ya 10 Ugushyingo 2021, cyatangaje ko tariki ya 04 Ugushyingo Kheira Hamraoui ukina mu kibuga hagati muri PSG yakuwe mu mudoka yari itwawe na Diallo, n’abantu babiri bari bipfutse mu maso (Mask) baramukubita bamugira intere.

Abagabo babiri bari bambaye Mask bakuye Kheira mu modoka yari itwawe na Aminata Diallo bakinana, bamushyira ku ruhande baramukubita cyane, aho bamukubise ferabeto (Fer a beton) mbere yuko biruka bahunga.

Ubwo bugizi bwa nabi bivugwa ko bwabereye hafi y’aho Hamraoui atuye, hari n’undi mukinnyi bakinana wari uhari.

Hamraoui w’imyaka 31 y’amavuko, yahise ajyanwa kwa muganga aho yari yakomerekejwe amaguru n’amaboko. Ibi byatumye uyu mukinnyi adakina umukino wa Champions League y’abagore PSG yakinnye na Real Madrid, wari kuba umukino wa 100 akiniye iyi kipe mu mateka.

Kuri uyu wa Gatatu, ubuyobozi bwa PSG bwasohoye itangazo rigira riti”Paris Saint Germain iremeza ko umukinnyi Aminata Diallo yajyanwe ku biro bya Polisi ya Versailles mu gitondo cyo kuri uyu wa gatatu, mu gihe hagikomeje iperereza ku rugomo rwakorewe Kheira Hamraoui”.

“Paris Saint-Germain iri gukorana bya hafi na Polisi ya Versailles mu iperereza kugira ngo uwagize uruhare mu rugomo rwakorewe Kheira Hamraoui”.

Iyi kipe kandi yatangaje ko ikomeje kwita ku buzima bw’uyu mukinnyi wakorewe urugomo kugira ngo agaruke mu kibuga vuba.

Diallo w’imyaka 26 y’amavuko, ukina mu kibuga hagati asanzwe anakinira ikipe y’igihugu y’u Bufaransa.

Diallo yatawe muri yombi ashinjwa kugambanira mugenzi we bakinana

Kheira ari mu bitaro nyuma yo gukubitwa n'abantu bataramenyekana





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND