Van de Beek wa Man.United n’umukobwa wa Dennis Bergkamp wakiniye Arsenal baritegura kwibaruka imfura

Van de Beek umaze igihe adahabwa umwanya uhagije wo gukina Manchester United nyuma yo kuyigeramo avuye muri Ajax Amsterdam yo mu Buholandi, yasangije abamukurikira ku mbuga nkoranyambaga ifoto ye ari kumwe n’umukunzi we Estelle, bagaragaza ko bagiye kwibaruka umwana wabo wa mbere.

Uyu mukinnyi amaze igihe kitari gito akundana n’umukobwa wa Dennis Bergkamp ufite amateka akomeye muri Arsenal ndetse no mu ikipe y’igihugu y’u Buholandi.

Estelle Bergkamp ni we mfura ya Dennis Bergkamp mu bana bane yabyaranye na Henrita Ruizendaal.

Nyuma y’igihe kitari gito bakundana, aba baholandi biyemeje kwagura umuryango bakibaruka, ndetse bikaba biri bugufi atari kera nkuko aba bombi babisangije ababakurikira ku mbuga nkoranyambaga.

Anyuze ku rukuta rwe rwa Instagram, Van de Beek yashyizeho ifoto ari kumwe n’umukunzi we Estelle, arangije yandikaho amagambo agira ati: “Twishimiye kubamenyesha ko twitegura kwibaruka”.

Abakinnyi bakinana muri Manchester United ndetse n’abandi basportif batandukanye bashimiye uyu mukinnyi ku ntambwe ikomeye agiye gutera mu buzima, bamubwira bati “Congrats”.

Van de Beek aheruka mu kibuga muri iki cyumweru hagati mu mukino wa UEFA Champions League Manchester United yanganyirije mu Butaliyani na Atalanta ibitego 2-2, aho yinjiye mu kibuga asimbuye.

Van de Beek na Estelle Bergkamp bamaze igihe kirekire bakundana