Ibyiciro 5 byongewe mu bihembo bya ‘Isango na Muzika’

Bitangwa ku bahanzi mu byiciro bitandukanye, abakinnyi ba filime, abatunganya indirimbo (Producer) mu buryo bw’amajwi n’amashusho mu rwego rwo gushyigikira urugendo rw’iterambere rw’umuziki w’u Rwanda.

Ibi bihembo bitegurwa hagamijwe kurushaho guhesha agaciro ibihangano by’abahanzi nyarwanda, cyane cyane binyuze mu kubashimira ibyo baba barakoze mu mwaka kugira ngo bagire ishyaka ryo gukomeza gutera imbere.

Ibi kandi bikanagira umumaro mu gutuma abahanzi bakiri bato bagira ishyaka ryo gukora ibihangano byiza kandi bifite ireme.

Kuri uyu wa Kane tariki 4 Ugushyingo 2021, abanyamakuru Kavukire Alex [Kalex] na Umufite Anipha bakoze ikiganiro ‘Isango na Muzika’ batangaza ku mugaragaro ibyiciro ‘category’ zemejwe zizashyirwamo abahatana.

Kalex uri gutegura ibi bihembo, yabwiye INYARWANDA, ko kuri iyi nshuro ya kabiri ibi bihembo byagutse mu buryo bugaragarira buri wese, kuko bongeyemo ibyiciro bitanu.

Ati “Umwaka ushize twari dufite ‘category’ icyenda, ubu dufite ‘category’ 14. Ikindi hari n’abandi bantu bazahabwa ishimwe ku munsi nyirizina. Ntabwo bajyaga batekerezwaho, ariko kuri iyi nshuro batekerejweho.”

Ibyiciro (Category) 14 byatangajwe ni icyiciro cy’umuhanzi w’umugabo w’umwaka (Best Male); icyiciro cy’umuhanzikazi w’umwaka (Best Female);

Icyiciro cy’umuhanzi mushya (Best New Artist), indirimbo y’umwaka (Song of the year), indirimbo nziza y’amashusho y’umwaka (Best Video of the year), Producer mwiza w’umwaka (Best Producer).

Uyobora/ufata amashusho mwiza w’umwaka (Best Director), indirimbo nziza ihuriwemo y’umwaka (Best Collabo), Album nziza y’umwaka (Best Album).

Hari kandi umuhanzi mwiza w’indirimbo ziha ikuzo Imana (Best Gospel Artist), umuhanzi mwiza w'injyana ya Hip Hop (Best Hip Hop Artist), umuhanzi mwiza w’indirimbo z’umuco (Best Culture&Tradition Artist), umukinnyi mwiza w’umugabo wa filime (Best Actor) n’umukinnyi w’umugore mwiza wa filime (Best Actress).

Ibihembo bya Isango na Muzika bizatangwa tariki 26 Ukuboza 2021 mu birori bizabera kuri Canal Olympia ku Irebero muri Kigali. Ndetse hazaba hari abahanzi bazasusurutsa ibi birori.

Abegukanye ibihembo bya Isango na Muzika ku nshuro ya mbere mu 2020:

Umuhanzi w’umugabo w’umwaka ‘Best Male Artist of the year 2020’ yabaye Bruce Melodie; umuhanzikazi w’umugore w’umwaka ‘Best Female Artist of the year 2020’ yabaye Alyn Sano.

Umuhanzi mushya w’umwaka wa 2020 ‘Best New Artist of the year 2020’ yabaye Juno Kizigenza. Indirimbo y’umwaka ‘Best Song of the year’ yabaye ‘Igare’ ya Mico the Best.

Producer mwiza w’umwaka utunganya indirimbo mu buryo bw’amajwi ‘Best Audio Producer of the year 2020’ yabaye Element wo muri Country Records. Producer w’umwaka utunganya amashusho ‘Best Video Director of the year 2020’.

Umuhanzi w’indirimbo zihimbaza Imana w’umwaka ‘Best Gospel Artist of the year 2020’ yabaye Israel Mbonyi.

Umukinnyi wa filime w’umwaka ‘Best Actor of the year 2020’ yabaye Niyitegeka Gratien uzwi nka Papa Sava/Seburikoko. 

Umukinnyi wa filime w’umugore w’umwaka ‘Best Actress of the year 2020’ yabaye Mama Nick uzwi muri filime ‘City Maid’.

Kavukire Alex [Kalex] na Umufite Anipha bakora ikiganiro ‘Isango na Muzika’ batangaje ‘category’ 14 z’ibihembo bizatangwa

Ibihembo “Isango na Muzika” bigiye gutangwa ku nshuro ya kabiri, hazatangwa n’ishimwe ku bantu kugeza ubu bataramenyekana