Messi yaciye agahigo mu mateka y’umupira w’amaguru muri Amerika y’Epfo

Kuri iki Cyumweru tariki ya 10 Ukwakira 2021, Argentine yatsinze Urguay ibitego 3-0 yongera amahirwe yo kuzerekeza muri Qatar mu mikino ya nyuma y’igikombe cy’Isi, kizakinwa mu mpera z’umwaka wa 2022.

Ibitego bya Argentine byatsinzwe na Messi winjije icya mbere, Rodrigo de Paul atsinda icya kabiri, mu gihe Lautaro Martinez yashyizemo icy’agashinguracumu.

Messi yatsindiye Argentine igitego cya 80 kuva yatangira kuyikinira, byatumye aca agahigo ko kuba umukinnyi wa mbere ku mugabane wa Amerika y’Epfo utsindiye ikipe y’igihugu cye ibitego byinshi kuva Isi yaremwa.

Nyuma y’umukino, uyu rutahizamu akanaba kapiteni w’ikipe y’igihugu ya Argentine, yagize ati: “Ntekereza ko tugenda tuzamura urwego rw’imikinire yacu, ubu turimo turakina umupira neza. Iri joro wari umukino ukomeye twagombaga gutsinda, kandi byose byagenze neza”.

Nyuma yo gutsinda uyu mukino, Messi na bagenzi be bongereye amahirwe yo kuzakina imikino ya nyuma y’igikombe cy’Isi kizabera muri Qatar 2022, kuko kuri uyu mugabane bari ku mwanya wa kabiri, inyuma ya Brazil ya mbere ifite amanota 28 mu mikino 10 imaze gukinwa.

Mu mukino uzakurikira, Argentine ya Messi izakina na Colombia, mu gihe Brazil ya Neymar izakina na Uruguay ya Suarez.

Messi yatsinze igitego cy'amateka muri Argentine

Messi yaciye agahigo muri Amerika y'Epfo ko gutsindira Argentine ibitego 80

Messi yashimiwe agahigo yaciye muri Amerika y'Epfo