Rayon Sports yasinyishije Lahssaine Ayoub wakiniraga Raja Cassablanca yo muri Maroc

Muri Nyakanga 2021, ni bwo Rayon Sports na Raja Cassablanca bagiranye amasezerano y’ubufatanye azamara imyaka Itanu, aho muri aya masezerano harimo n’ingingo yo gutizanya abakinnyi. Ku ikubitiro, Raja Cassabalanca yatije umukinnyi wa mbere Rayon Sports, nyuma y’amezi abiri bagiranye amsezerano.

Mu gitondo cyo kuri uyu wa Gatandatu tariki ya 25 Nzeri 2021, Rayon Sports nibwo yatangaje ko yatijwe na Raja umukinnyi witwa Ait Lahssaine Ayoub ukina mu kibuga hagati.

Ibinyujije ku rukuta rwayo rwa Twitter, Rayon Sports yagize iti "Tunejejwe no gutangaza ko twasinyije umukinnyi wo hagati Ait Lahssaine Ayoub w’imyaka 21 ku ntizanyo ya Raja Casablanca".

Ait Lahssaine Ayoub w’imyaka 21 yazamukiye mu makipe y’abato ba Raja Casablanca, ni umukinnyi ukina mu kibuga hagati ariko afasha ba rutahizamu, akaba yatijwe Rayon Sports aho yayisinyiye amasezerano y’umwaka umwe ushobora kongerwa.

Ubufatanye Rayon Sports yasinyanye na Raja burimo ko Raja Casablanca izajya itiza abakinnyi Rayon Sports FC, ikazajya inayifasha mu bikorwaremezo, gukorera umwiherero muri Maroc, kongera imbaraga mu buvuzi, kuzamura impano ku ngimbi z’iyi kipe yaboneye izuba i Nyanza no kujya zikina imikino ya gicuti, ibijyanye n’ikoranabuhanga n’ibindi.

Raja Casablanca ni yo kipe ikunzwe na benshi muri Maroc. Ni yo ibitse igikombe gihuza amakipe yatwaye ibikombe iwayo ’CAF Confederation Cup’ cya 2020/21. Ibitse ibikombe 12 bya shampiyona, bitatu bya CAF Champions League, bibiri bya CAF Confederation Cup. Ibitse ibikombe birenga 31 byose hamwe harimo n’ibindi yagiye yegukana.

Rayon Sports ikomeje kwitegura umwaka w’imikino wa 2021/22, aho iri gukoresha abakinnyi batandukanye igeragezwa kugira ngo itoranyemo abo izakoresha umwaka utaha, iyi kipe kandi kuri uyu wa Gatanu yakinnye umukino wa gicuti na Musanze FC, iyitsindira ku Bworoherane igitego 1-0, cyatsinzwe na rutahizamu w’umunya-Cameroun Willy Onana uri mu igeragezwa.

Rayon Sports yatangaje ko yasinyishije Ayoub wakiniraga Raja Cassablanca yo muri Maroc

Ayoub yasinye amasezerano y'umwaka umwe ushobora kongerwa

Ayoub w'imyaka 21 y'amavuko yakuriye mu ikipe ya Raja Cassablanca

Rayon Sports yatsinze Musanze FC mu mukino wa gicuti 1-0