Bwiza Emerance yarangije Album ya mbere yakozweho n’abarimo Madebeats na Danny Vumbi

Yahigitse bagenzi be abarushije kuririmba neza, agaragaza igikundiro mu gihagararo ku rubyiniro.

Akimara kwinjira muri Label ya Kikac, bahise batangira kumufasha gukora indirimbo yakubiye kuri Album ye ya mbere. Izumvikanaho we wenyine kuko nta wundi muhanzi bigeze bakorana.

Ni Album ikozwe mu gihe kitageze ku mezi ane, ndetse zimwe mu ndirimbo ziyigize ziratangira gusohoka mu mpera z’uku kwezi.

Yakozweho na ba Producer bane barimo Producer Madebeats wakoze 60% by’iyi Album, Producer Element, Producer Bob ndetse na Producer Niz Beat (Ni we wakoze indirimbo ikunzwe yitwa ‘Igikwe’ ya Gabiro Guitar na Confy.

Indirimbo ziri kuri iyi Album Bwiza yazanditse afatanyije n’umwanditsi w’indirimbo Danny Vumbi ndetse na Mico The Best. Uyu muhanzikazi anafiteho indirimbo ye yiyandikiye.

‘Byasabye umwiherero!’ Uyu muhanzikazi yari amaze igihe muri Musanze mu Ntara y’Amajyaruguru ari kumwe na Producer Madebeats ndetse na Danny Vumbi ari naho bashyiriyeho akadomo ka nyuma.

Uhujimfura Jean Claude Umuvugizi wa Kikac yabwiye INYARWANDA, ko iyi Album ikubiyeho indirimbo zivuga ku rukundo n’ubuzima busanzwe.

Avuga ko ari ‘Album nziza’ abantu bakwiye kwitega, kandi ko buri ndirimbo izajya isohokana n’amashusho yayo.

Bwiza Emerance yiga mu mwaka wa mbere muri Kaminuza ya Mount Kenya mu Ishami rya Hospitality and Tourism Management, aho yatangiye kwiga mu 2020.

Ni imfura mu muryango w’abana bane, mu bakobwa babiri n’abahungu babiri. Abana na Nyina na Se mu Mujyi wa Nyamata mu Karere ka Bugesera mu Ntara y’Uburasirazuba.

Yavukiye i Gitarama, ni mu Karere ka Muhanga mu Ntara y’Amajyepfo, umuryango uza kwimukira i Kigali nyuma bajya gutura i Nyamata.

Amashuri abanza yize kuri Kigali Harvest ku Kimihurura. Icyiciro rusange (O Level, Tronc Commun), yize kuri Saint Joseph amaze gufata ishami ryo kwiga (A Level) yize kuri Saint Bernadette mu Karere ka Gisagara, asoreza ayisumbuye kuri Saint Aloys mu Karere ka Rwamagana mu Burasirazuba bw’u Rwanda.

Yakuze akunda umuziki ahanini biturutse ku kuba yarajyanaga n’ababyeyi be mu rusengero akishimira uko baririmba. Uko yigiraga hejuru mu myaka ni nako yajyaga kuririmba muri korali zitandukanye zirimo iz’abana arabikomeza kugeza n’ubu.

Uyu mukobwa yaririmbye muri korali kuva ku myaka 8 y’amavuko, ku buryo atazibuka neza amazina. Ndetse muri iki gihe, ni umwe mu baririmbyi b’urusengero asengeramo rwakoreraga i Kigali nyuma rwimukira i Nyamata.

Arajwe ishinga no gushyira itafari ku muziki w’abakobwa mu Rwanda, akagaragaza ko ibyo abahungu bakora n’abakobwa babikora mu muziki.

Bwiza Emerance, Producer Madebeats ndetse na Danny Vumbi bakoze kuri Album

Bwiza yasoje Album ye ya mbere afashijwe n’umunyamuziki ubimazemo igihe kinini, Semivumbi Daniel [Danny Vumbi]