Ramos yasezeye Varane mu gahinda ndetse anamwibutsa urugendo rw'imyaka 10 bamaranye aho batsinzwe imikino 2 gusa

Varane yageze muri Real Madrid asanga Sergio Ramos amazemo imyaka 6 yamwakiriye nk'umwana ufite ejo hazaza kuko Varane yahageze ku myaka 18 none ahavuye ku myaka 28. Ni ubuzima bugiye kugorana Kuri Real Madrid itakaje imyaka 10 y'urukundo ubwitange, uburambe n'ubunyangamugayo hagati ya Varane na Ramos.

Ubufatanye bwa Ramos na Varane bwamaze hafi imyaka 10 ariko by'umwihariko kuva mu 2014 kugera mu 2018, aho batwaye Champions league enye na shampiyona eshatu. Varane yateganyaga gusigara ari umwugarizi mukuru muri Real Madrid ndetse agakorana na Ancelotti wari ugarutse bwa Kabiri gusa siko byagenze kuko na we yisanze hanze y'iyi kipe ifite ibikombe 13 bya Champions League.

Aba bakinnyi bahurizaga hamwe 

Kuva ubwo aba bakinnyi batangiraga gukorana kuba mu Gushyingo 2011 kugera Kuri champions league ya 2018 Ramos na Varane batakaje umukino umwe gusa muri Champions League. Uyu mukino ni uwa 2017 ubwo Real Madrid yatsindwaga na Atletico Madrid ibitego 2-1 ariko nabwo Real irakomeza kuko yari yaratsinze ibitego 3-0 mu mukino ubanza. Indi mikino Real Madrid yatsinzwe ni umukino wa Borussia Dortmund na Juventus ariko icyo gihe ntago Ramos na Varane bari kumwe mu kibuga.

Undi mukino aba bakinnyi batsinzwe muri Champions League bari kumwe ni umwaka w'imikino 2019-2020 ubwo Manchester City yatsindaga Real Madrid ibitego 2-1 uba umukino wa Kabiri mu mateka yabo aba bakinnyi batsinzwe muri Champions League ubu ibisigaye ni amateka. Bari kumwe, Ramos na Varane batsinze imikino 31 banganya 11 batsindwa ibiri gusa mu mikino 44 ya Champions League bakinanye.

Ramos Abinyujije ku rukuta rwa Instagram yasezeye Varane anamushimira urukundo bagiranye. Yagize ati "Nshuti Yanjye Varane icyo navuga ni kimwe gusa, ni iyi myaka twari tumaranye y'ubushuti imyaka yo gutsinda ndetse no gutwara ibikombe. Ndakwifuriza amahirwe masa ku cyiciro cyindi ugiyeho kandi mpamya ko kikunejeje. Ubwo tuzahura bizaba ari byiza cyane kuko urabizi ko ndi gukinira ikipe y'iwanyu".

Varane yasanze ubufatanye bwa Ramos na Pepe bwarangiye ubwo Pepe yari avuye muri Real Madrid ariko nabwo Raphael Varane yari yaratangiye kumwima umwanya wo gukina.