Ahabanza Imikino

Kwizera Olivier yarekuwe nyuma y'iminsi 33 yari amaze mu gihome

Yanditswe na: ISHIMWE Olivier Ba
Taliki:6/07/2021 20:21 0

Umuzamu w'Amavubi n'ikipe ya Rayon Sports Kwizera Olivier ndetse n'abandi bantu 7 bari bafunganywe, Urukiko rwa Kicukiro rwategetse ko bafungurwa.

Kuri uyu wa 2 tariki 6 Nyakanga ni bwo aba basore bagera ku 8 barimo Kwizera Olivier na Runanira Amza wakiniye Rayon Sports, basomewe imyanzuro y'urubanza ku byaha bari bakurikiranweho byo gukoresha ibiyobyabwenge.

Uru rubanza rwabereye ku rukiko rwa Kicukiro. Urukiko rwemeje ko aba basore bagera ku munani bahamwe n'icyaha cyo gukoresha ikiyobyabwenge cy'urumogi. Nyuma yo guhamwa n'iki cyaha, bahanishijwe igihano cy'umwaka umwe ariko gisubitswe mu gihe cy'umwaka umwe, bivuze ko bahise barekurwa.

Urukiko kandi rwategetse ko aba basore bafatanya gutanga amagarama y‘urukiko ahwanye n’ibihumbi icumi (10,000Frw), aya batayatanga kuva uru rubanza rubaye ndakuka akavanwa mu mitungo yabo ku ngufu za Leta.

Kwizera Olivier wafunguwe kuri uyu wa 06 Nyakanga 2021, yatawe muri yombi n'Ikigo cy'Igihugu cy'Ubugenzacyaha, RIB, kuwa Gatanu tariki 4 Kamena 2021 afatiwe mu rugo rwe ruherereye mu Murenge wa Kigarama, Akarere ka Kicukiro. Afunguwe nyuma y'iminsi 33 (ukwezi kumwe n'iminsi 3) yari amaze mu gihome.