Rodrigo Duterte, Perezida w’igihugu cya Philippine, yatangarije abaturage be ko uzanga kwikingiza Covid-19 azamufunga, ibi akaba yabitangaje kuwa mbere tariki 21 Kamena 2021 kuri televiziyo. Ni mu gihe iki gihugu ari kimwe mu bihugu byo muri Aziya byibasiwe cyane na Covid-19.
Muri iki gihugu cya Philippine, abantu barenga miliyoni 1.3 bamaze kwandura Covid-19 naho abagera mu bihumbi 23 bakaba barahitanywe n’iki cyorezo. Kuri uyu wa mbere, kuri televiziyo, Perezida Duterte yagize ati: "Urahitamo, urukingo cyangwa nzagufunga."
Aya magambo ya Duterte akaba avuguruza ay'abashinzwe ubuzima, bavuze ko muri iki gihugu abantu basabwa kwikingiza ku bushake. Perezida Duterte ku ijambo rye yongeyeho ati: "Ntunyumve nabi, muri iki gihugu hari ikibazo. Ndakajwe cyane n'Abanyafilipine batumvira guverinoma."
Kugeza ku ya 20 Kamena, muri Filipine hamaze gukingirwa abantu bagera kuri miliyoni 2.1 aho “ubuyobozi bubona ko biri kugenda buhoro” kuko bafite gahunda yo gukingira abagera muri miliyoni 70 uyu mwaka mu baturage miliyoni 110 batuye iki gihugu. Duterte ukomeje kunengwa uburyo bwe bwo guhangana na Covid-19, yakomeje kwemeza icyemezo cye ko amashuri atazafungura.
Mu myaka ishize, igihugu cya Philippine cyagarutsweho cyane kubera ubwicanyi bwahabaye. Ibi byatumye urukiko mpuzamahanga mpanabyaha ruhamagaza Perezida Duterte nawe yanga kwitaba ngo “ntiyaburanira cyangwa ngo arege ibirego imbere y’abazungu” ndetse muri 2018 igihugu cye agikura mu bihugu bigize ICC.
Mu mwaka wa 2016, nyuma yo gutsindira kuba Perezida, Duterte yatangije “urugamba rwo guhashya ibiyobyabwenge” aho abantu ibihumbi bapfiriye. Imiryango iharanira uburenganzira bwa muntu yavuze ko “Abayobozi” bishe “abakekwaho ibiyobyabwenge” naho Duterte we akavuga ko “abishwe ari abarwanyaga inzego z’umutekano”.
Source: CNN
Eng
RSS 
TANGA IGITECYEREZO