RFL
Kigali

Breaking: Ubukwe bwasubitswe, ingendo hagati ya Kigali n'Intara zirahagarikwa hanashyirwaho 'Saa Moya'

Yanditswe na: Mupende Gedeon Ndayishimiye
Taliki:21/06/2021 21:04
1

Inama y'Abaminisitiri Idasanzwe yateranye kuri uyu wa Mbere tariki 21 Kamena 2021 iyobowe na Perezida Paul Kagame, yashyizeho ingamba zigamije kurwanya no gukumira icyorezo cya Covid-19, muri izo ngamba harimo ingingo ivuga ko ingendo hagati y'Umujyi wa Kigali n'Intara zihagaritswe ndetse n'ubukwe nabwo busubitswe (Imihango yose).



Nyuma yo kubona imibare y'abandura Covid-19 ikomeje kwiyongera, Inama y'Abaminisitiri yafashe ingamba mu rwego rwo gukomeza kwirinda no gukumira ubwiyongere bwa Covid-19. Mu rwego rwo gukomeza gukumira ikwirakwira rya Covid-19, abaturage bose barongera kwibutswa ko ari ngombwa kubahiriza amabwiriza yo kwirinda Covid-19 harimo; gusiga intera hagati y'umuntu n'undi, kwambara agapfukamunwa neza no gukaraba intoki. Abatazabyubahiriza bazafatirwa ibihano.

Ingamba zashyizweho n'Inama y'Abaminisitiri zigomba gutangira gushyirwa mu bikorwa guhera kuwa Gatatu, tariki ya 23 Kamena 2021, kandi zizongera kuvugururwa nyuma y'ibyumweru bibiri hashingiwe ku isesengura ry'inzego z'ubuzima. Mu ngamba zafashwe; ingendo zirabujijwe kuhera Saa Moya z'ijoro kugeza saa kumi za mu gitondo. Ibikorwa byose byemerewe gukomeza bizajya bifunga saa kumi n'ebyiri za nimugoroba.

Ingendo hagati y'Umujyi wa Kigali n'Intara, ndetse n'ingendo hagati y'Uturere tundi tw'igihugu zirabujijwe kereka ku mpamvu za serivisi z'ubuzima cyangwa izindi serivisi z'ingenzi. Icyakora imodoka zitwaye ibicuruzwa zemerewe kugenda mu Turere twose ariko ntizitware abantu barenze babiri. Inama zikorwa imbonankubone zizakomeza. Umubare w'abitabira inama ntugomba kurenga 30% by'ubushobozi bwo kwakira abantu bw'aho bateranira. Abitabira inama bagomba kugaragaza ko bipimishije Covid-19.

Imihango y'ubukwe yose nayo yahagaritswe!

Amateraniro rusange harimo ubusabane n'ibirori bitandukanye, byaba ibibera mu ngo cyangwa ahandi hose birabujijwe. Imihango y'ubukwe yose harimo gusaba no gukwa, ishyingirwa rikorewe imbere y'Ubuyobozi bwa Leta n'irikorewe mu nsengero birabujijwe. Ibikorwa by'inzego za Leta bizakomeza, ariko buri rwego rurasabwa gukoresha abakozi b'ingenzi batarenze 15% by'abakozi bose, abandi bakozi bagakorera mu rugo, ariko bakagenda basimburana.

Mu bindi byemerejwe muri iyi nama y'Abaminisitiri, ni uko Utubari twose tuzakomeza gufunga. Pisine na Spas zizakomeza gufunga, icyakora abacumbitse muri hoteli bemerewe gukora izo siporo muri hoteli bacumbitsemo ariko berekanye ko bipimishije Covid-19. Siporo y'umuntu ku giti cye n'izikorerwa hanze abantu bategeranye bizakomeza, hubahirizwa ingamba zo kwirinda Covid-19. Resitora na Cafe zizakomeza gukora ariko ntizirenze 30% y'ubushobozi bwazo bwo kwakira abantu. 

Insengero zahawe uburengazira bwo gukora kuko zujuje ibisabwa mu kwirinda Covid-19 zizakomeza kwakira abantu ku kigero kitarenze 30% by'ubushobozi bwazo. Umubare w'abantu bitabira ikiriyo ntugomba kurenza abantu 10 icyarimwe. Imihango yo gushyingura ntigomba kurenza abantu 30. Ibikorwa by'imikino y'amahirwe bizafungura mu byiciro. Gahunda y'uko bizafungura izatangazwa na Minisiteri y'Ubucuruzi n'Inganda nyuma yo kugenzura ko byubahirije ingamba zo kwirinda Covid-19.



Imyanzuro y'Inama y'Abaminisitiri yo kuri uyu wa Mbere






TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • Ndi fidele1 month ago
    Ni byiza kuko covid yari imeze nabi



Inyarwanda BACKGROUND