Bari babujijwe gufata amafoto n’amashusho! Ibikubiye muri ‘Invitation’ y’ubukwe bwa Meddy na Mimi

Meddy w’imyaka 31 y’amavuko yakoze ubukwe bw’igiciro kinini na Mimi mu birori byabereye muri Leta ya Texas muri Leta Zunze Ubumwe za Amerika, tariki 22 Gicurasi 2021. Bivugwa ko bamaze imyaka itanu batangiye urugendo rw’urukundo, rufite igice kinini kitamenywe na rubanda.

Ubukwe bw’aba bombi bwitabiriwe n’abantu bazwi mu ruganda rw’imyidagaduro barimo abahanzi, abakinnyi ba filime, ba Nyampinga, ababyeyi, inshuti, abavandimwe n’abandi bashyigikiye intambwe nshya yatewe n’umuhanzi Meddy.

‘Invitation’ y’ubukwe bwa Meddy na Mimi yabonaga umugabo igasiba undi! INYARWANDA ifite kopi y’ubutumire bwa Meddy na Mimi igaragaza agace ubukwe bwabereyemo, gahunda y’umusangiro, ibyo abatumiwe bari babujijwe n’ibindi.

Ni ‘invitation’ y’urupapuro rw’umweru, yanditseho amagambo ari mu ibara ry’umukara. Ifite imitako mu mpande ishushanyije ikoze mu ibara ry’umukara, imeze nk’imirongo isobekeranye.

Iyi ‘invitation’ itangira yerekana igihe ubukwe buzabera, bavuga ko ari tariki 22 Gicurasi 2021 ahitwa The Hillside Estate ku muhanda 90 Moseley Rd, Cross Roadds, TX 76227.

Ivuga ko abatumiwe bagombaga kugera ahabereye ubukwe saa kumi n’imwe z’umugoroba (5 P.M) ku isaha yo muri Leta ya Texas bagasangira icyo kunywa no kurya bateguriwe “Cocktail.”

Ubu butumire bunagaragaza ko kuhagera kw’abatumiwe no gusangira "cocktail" byari byahawe isaha imwe, hanyuma saa moya z’umugoroba bakajya kwiyakira bari kumwe n’abageni. Ntihatangazwa aho bagombaga kwiyakirira.

Meddy n’umukunzi we Mimi kuri ‘invitation’, bamenyesha uwatumiwe ko yagenewe umwanya umwe w’icyicaro. Bati “Twaguteganyirije ibyicaro by’umwanya umwe mu byubahiro byanyu. Kandi mu gihe cyo kwiyakira hakenewe umuntu mukuru gusa.”

Meddy na Mimi kuri 'invitation' bavuzemo ko nta muntu wemerewe kwifashisha telefoni afata amafoto n'amashusho y'ubukwe bwabo

Aba bageni bakomeza bavuga ko ari ikizira kikaziririzwa gufata amafoto n’amashusho mu bukwe bwabo wifashishije telefoni. Bati “Turakumenyesha ko ubujijwe gufata amafoto n’amashusho ku bw’ubuzima bwite bwacu.”

Kuri invitation, Meddy na Mimi bavuze ko hari ba gafotozi n’abafata amashusho “b’umwuga” bateguwe bazafata uko umuhango w’ubukwe uzagenda “bazabasangiza amafoto yanyu n’abageni.”

Abatumiwe muri ubu bukwe barenze ku itegeko! 

Kuva mu rucyerera rwo ku Cyumweru tariki 23 Gicurasi 2021, amashusho n’amafoto ‘adasa neza’ abageni batifuzaga gusohoka, yatangiye guhererekanywa ku mbuga nkoranyambaga n’abatashye ubukwe bifashishije telefoni bagasangiza abandi.

Ni amafoto n’amashusho agaragaza umunezero waranze ubu bukwe, abahanzi baririmbiye mugenzi wabo, uko umugeni yasezeye ku rungano mu ndirimbo y’umuco wabo muri Ethiopia n’ibindi.

Ku Cyumweru tariki 23 Gicurasi 2021, Mimi yanditse kuri konti ye ya Instagram abwira Meddy ko azakomeza ‘kuba mu biganza bye iteka ryose.’

Meddy bivugwa ko agiye kwinjira mu muziki w’indirimbo zihimbaza Imana azwi mu ndirimbo zirimo nka ‘Slowly’, ‘Ntawamusimbura’ igaragaramo Mimi barushinze n’izindi.

Iyi ndirimbo yabaye intangiriro y’urukundo rwabo yasohotse tariki 09 Mutarama 2017, imaze kurebwa n’abantu barenga miliyoni 6 kuri shene ya Youtube ya Press One Rwanda.

Muri Nzeri 2017, ni bwo Meddy yahishuye ko ari mu rukundo n’umukobwa uba muri Amerika, yirinda gutangaza byinshi bimwerekeyeho.

Yavugaga Mimi w’uburanga ugaragara mu mashusho y’indirimbo yise ‘Ntawamusimbura’. Urukundo rwabo rw’igifute rwagiye rushimangirwa n’amagambo meza, amafoto n’ibindi byinshi bashyira hanze basangiza abandi.

Kuya 27 Ukuboza 2018 hacicikanye amafoto agaragaza umubyeyi wa Meddy yakiranye urugwiro Mimi wamaze kuba ‘umukazana’ we.

Mu kiganiro n’itangazamakuru nyuma y’igitaramo cyiswe “East African Party” cyabaye tariki 01 Mutarama 2019, Meddy yabajijwe uko umukunzi we yakiriwe mu muryango we. Avuga ati “Barishimye, barishimye cyane. Byose byagenze neza.”

Inkuru bifitanye isano: Ibintu bitanu wasigarana ku bukwe bwa Meddy na Mimi ukomoka muri Ethiopia

Abatashye ubukwe bwa Meddy na Mimi babanje gufata icyo kurya no kunywa byoroheje mbere y'uko bajya mu musangiro

Meddy na Mimi (M&M) bavuze ko hari ba gafotozi bateguwe bazafata uko umuhango wose uzagenda

Abatumiwe ntibubahirije ibyo bari basabwe muri 'invitation' kuko amafoto n'amashusho byatangiye gusohoka ubukwe butararangira

Meddy na Mimi barushinze tariki 22 Gicurasi 2021 muri Leta ya Texas muri Amerika

Aba bageni banasohoye 'Email' yibutsa abatumiwe gahunda y'ubukwe bwabo

Meddy na Mimi bazajya kwiyerekana ku ivuko ry'uyu mukobwa muri Ethiopia

Bahati Grace Nyampinga w'u Rwanda 2009 [Uri iburyo] ari mu batashye ubukwe bwa Meddy na Mimi

Meddy yaririmbiye umugeni we, Mimi