Umukino wa nyuma wa Champions League wagombaga kubera muri Turikiya wimuriwe muri Portugal

Portugal yitezweho kwakira umukino wa nyuma wa Champions League, nyuma yuko Impuzamashyirahamwe y'umupira w'amaguru i Burayi (UEFA) idashoboye kwemererwa gusonerwa yashakaga mu gihe yaba iwujyanye ku kibuga cya Wembley i London.

UEFA, Abayobozi ba leta y'u Bwongereza n'ishyirahamwe ry'umupira w'amaguru muri iki gihugu (FA), bakoranye inama ku wa mbere biga ku kwimura umukino wa Chelsea na Manchester City ukava i Istanbul muri Turukiya.

UEFA yafashe icyemezo ko uwo mukino wimurwa nyuma yuko Ubwongereza bushyize Turukiya ku rutonde rw'ahagomba kwirinda kuhakorera ingendo (ruzwi nka 'red list') kubera ubwandu buri hejuru bwa Covid-19, bivuze ko abafana batajyayo.

Portugal iri ku rutonde rw'icyatsi kibisi (green list) ruvuze ko irimo ubwandu bwa Covid-19 buri hasi, rero abafana bashobora kuhajya ku mukino wa nyuma wo ku itariki ya 29 y'uku kwezi kwa gatanu.

Ikibuga Estadio do Dragao cy'ikipe ya Porto, byitezwe ko kuri uyu wa kane gitangazwa ko ari cyo kizakira umukino wa nyuma wa Champions League kubera ko UEFA yahitamo ko udakinirwa i Lisbon, ahakiniwe umukino wa nyuma mu mwaka ushize.

UEFA yibaza ko gukinira uwo mukino muri Portugal bizorohereza kurushaho abaterankunga n'abanyamakuru kuhagera, aba bombi bikaba byasaba ko bahabwa indishyi mu gihe baba badashoboye kugera ku mukino.

Ariko, UEFA kugeza ubu ntabwo iremeza uko guhinduranya, kwatuma Istanbul ihabwa kwakira umukino wa nyuma wo mu 2023, mu gihe mbere yari yitezweho kwakira umukino wa nyuma wo mu mwaka ushize, ukaza kwimurirwa i Lisbon.

Umukino wa nyuma wa Champions League y'uyu mwaka uracyashobora kuba wakinirwa i Wembley, ariko ibyo byasaba impinduka ikomeye ku ruhande rwa leta y'Ubwongereza, kugeza ubu yananiwe kugera ku bwumvikane na UEFA.

Abagenzi bavuye mu Bwongereza berekeza mu bihugu biri ku rutonde rw'icyatsi kibisi, bagomba gukurikiza amategeko mbere yo gufata urugendo, ariko ntabwo basabwa kwishyira mu kato mu gihe basubiye mu gihugu iwabo.

Abaturage b'Ubwongereza bavuye mu bihugu biri ku rutonde rutukura (red list) basabwa kwishyira mu kato mu gihe cy'iminsi 10 muri imwe mu mahoteli yemejwe na leta y'Ubwongereza.

Ako kato kagira ingaruka ku bakinnyi bazakina Euro 2020, izatangira ku itariki ya 11 y'ukwezi kwa gatandatu.

Ku wa gatanu, Minisitiri w'Ubwongereza wo gutwara abantu n'ibintu Grant Shapps yavuze ko ibihugu biri ku rutonde rutukura rwa Covid-19 "bidakwiye gusurwa keretse mu bihe byihariye cyane".

UEFA yari yizeye guha buri kipe izakina umukino wa nyuma tike zitari munsi ya 4,000 zo kwinjira ku kibuga Ataturk Olympic Stadium cy'i Istanbul.

Minisitiri Shapps yavuze ko FA iri mu biganiro na UEFA kuri uko kwimura umukino, ariko "mu mpera ni UEFA izafata icyemezo".

Itsinda rivugira abafana ba Chelsea ryavuze ko rizahura na UEFA rigasaba ko umukino wa nyuma ujyanwa mu Bwongereza, mu gihe amatsinda y'abafana ba Man City yavuze ko agiye kongera gusaba ko umukino uvanwa i Istanbul.

Hari n'ikibazo cyo gucyemura, kuko Wembley ifite gahunda yo kwakira umukino wa nyuma wa 'play-off' muri 'championship' ku itariki ya 29 y'ukwezi kwa gatanu. Ariko, byumvikana ko ababishinzwe bashobora kwimura uwo mukino babaye babisabwe na UEFA.

Umukino wa nyuma wa Champions League uyu mwaka wimuriwe Estadio do Dragao muri Portugal

Byari bizwi ko uyu mukino uzabera Ataturk Olympic Stadium muri Turikiya