Mu Buhinde: Imbwa yatawe muri yombi kubera ko yarenze ku mabwiriza yo kwirinda Covid-19

Mu Buhinde bakomeje gutabaza inkunga n’ubufasha bwaturuka hirya no hino ku isi kuko abarwayi ba Coronavirus barenze ubushobozi bw’ibitaro, amavuriro akaba yaruzuye ku buryo ubu uri kwandura Coronavirus ashobora kurembera mu rugo.

Inkuru itangaje yatangajwe n’ikinyamakuru Indiatoday, ivuga ko imbwa nayo yamaze gutabwa muri yombi kubera kurenga ku mabwiriza ikava mu rugo kandi bitemewe. Mu gace ka Palasia ko mu mujyi wa Indore wo mu Buhinde, bashyizeho gahunda ya 'Guma mu rugo' ku bantu bose, gusa igitangaje ni uko bafashe imba bakajya kuyifunga kubera ko yavuye mu rugo bibujijwe.

Yatawe muri yombi ubwo itsinda ry'abapolisi ryari ku irondo kugira ngo barebe ko isaha yo gutaha yatangajwe yakurikijwe. Andi makuru avuga ko iyi mbwa itatawe muri yombi yonyine ahubwo na Nyirayo yafunzwe. Nyir’imbwa usanzwe ari umucuruzi, nawe yafashwe n’abapolisi ari kumwe n’iyo mbwa bagenda mu masaha atemewe. Icyakora polisi yahakanye amakuru y'itabwa muri yombi y'iyi mbwa.

Indore ni intara yibasiwe na coronavirus muri Madhya Pradesh. Ishami ry’ubuzima rivuga ko umubare w’ubwandu mu karere ugera kuri 1,19,902, harimo n’abapfuye 1,176. Ku wa Gatatu, Madhya Pradesh yanduyemo abantu 12,319.