Manchester United irarira ayo kwarika nyuma yo gutakaza rutahizamu wayo ushobora kuzagaruka mu kibuga umwaka utaha

Martial, w'imyaka 25, yakiniye Ubufaransa mu mukino wabuhuje na Ukraine n'uwabuhuje na Kazakhstan mu mpera y'ukwezi gushize, aza kuvunika mu ivi.

Umutoza Ole yagize ati: "Kubura Anthony igihe gisigaye cy'uyu mwaka w'imikino birababaje cyane".

"Amakuru yavaga mu Bufaransa yari uko imvune ye idakomeye ariko biragaragara ko ari mbi".

Mu kiganiro na BT Sport, umutoza Ole yongeyeho ko ikipe ye yizeye kongera kumubona ayikinira mbere y'impera y'uyu mwaka w'imikino ariko batabyizeye neza.

Martial yatsindiye Manchester United ibitego birindwi muri uyu mwaka mu mikino yose muri rusange, ariko yatsinze bitatu gusa mu mikino 19 mu 2021.

Byitezwe ko Manchester United igiye kuba idafite myugariro Eric Bailly mu gihe gito kiri imbere nkuko umutoza Ole yabivuze, kubera ko bamusanzemo coronavirus ubwo yari kumwe n'ikipe y'igihugu ya Côte d'Ivoire, akaba atarasubira mu Bwongereza.

Ku wa kane w'iki cyumweru no ku wa kane w'icyumweru gitaha, United izahura na Granada yo muri Espagne muri ¼ cya Europa League, ndetse ijye gukina na Tottenham iwayo ku cyumweru muri shampiyona.

Mu mikino 30 ya shampiyona imaze gukinwa, Manchester United iri ku mwanya wa kabiri n’amanota 60, ikaba irushwa na Manchester City ya mbere amanita 14.

Martial wavunikiye mu ikipe y'igihugu y'u Bufaransa ashobora kumara igihe kirekire hanze y'ikibuga