Umunya-Benin wasifuye umukino wahuje ikipe ya Salitas FC yo muri Burkina Faso na Bouenguidi FC yo muri Gabon mu ijonjora rya nyuma rya CAF Confederation Cup, Lucien Toudignon, ari mu bitaro nyuma yo gukubitwa n'abakinnyi ba Bouenguidi bamushinje kubogama mu mukino bikabaviramo gusezererwa mu irushanwa.
Uyu mukino wo kwishyura wabereye muri Burkina Faso warangiye Salitas itsinze Bouenguidi ibitego 3-1, mu gihe umukino ubanza Bouenguidi yari yatsinze 1-0, birangira iyi kipe yo muri Gabon isezerewe ku kinyuranyo cy'ibitego 3-2.
Uyu mukino ikipe ya Bouenguidi yabonyemo ikarita itukura, abakinnyi bayo batemeranyije n'umusifuzi yamuranze mu mukino.
Nyuma yuko iminota 90 y'umukino irangiye Bouenguidi inaniwe kwishyura ibitego yatsinzwe, abakinnyi basatiriye umusifuzi Lucien Toudignon baramuhondagura kugeza bamusize ari intere, bamuvana ku kibuga bamujyana mu bitaro.
Uyu mukino wabaye ku cyumweru tariki ya 21 Gashyantare 2021, ushobora gusiga mu byago bikomeye ikipe kuko ishobora gufatirwa ibihano bikomeye n'Impuzamashyirahamwe y'umupira w'amaguru muri Afurika 'CAF' birimo no guhagarikwa mu marushanwa itegura mu gihe kirenze umwaka ndetse hakagerekwaho n'amande.
Ntabwo ari Bouenguidi yonyine ishobora guhanwa, kuko na Gormahia ishobora gufatirwa ibihano kuko mu mukino nayo yasezerewemo na Napsa Stars yo muri Zambia, abakinnyi b'iyi kipe yo muri Kenya nabo bagaragaye basagarira umusifuzi wayoboye umukino.
Umusifuzi Lucien ari mu bitaro nyuma yo gukubitwa n'abakinnyi ba Bouenguidi FC
Eng
RSS 
TANGA IGITECYEREZO