Kigali

Australian Open 2021: Djokovic yegukanye igikombe bwa gatatu yikurikiranya ashimangira umwanya wa mbere ku Isi - AMAFOTO

Yanditswe na: SAFARI Garcon
Taliki:22/02/2021 11:03
0

Umunya-Serbia umaze kuba ubukombe mu mukino wa Tennis ku Isi, Novak Djokovic, yegukanye igikombe cy'uyu mwaka mu irushanwa rya Australiana Open ku nshuro ya gatatu yikurikiranya nyuma yo gutsinda umurusiya Daniil Medvedev seti 3-0 ku mukino wa nyuma, akomeza gushimangira umwanya wa mbere ku Isi.



Kuri iki cyumweru tariki ya 21 Gashyantare 2021, ku kibuga  the Rod Laver Arena mu mujyi wa Melbourne mu gihugu cya Australia, habereye umukino wa nyuma mu irushanwa rya Australian Open 2021, warangiye Djokovic atsinze Daniil Medvedev seti 3-0, ahita yegukana igikombe.

Djokovic yatsinze seti ya mbere ku manota 7-5, atsinda n'iya kabiri 6-2, anatsinda iya gatatu 6-2.

Byasabye isaha imwe n'iminota 53 kugira ngo Djokovic atsinde Medvedev mu mukino wamworoheye cyane.

Uyu munya-Serbia w'imyaka 33 y'amavuko, yegukanye iri rushanwa ku nshuro ya gatatu yikurikiranya nyuma yuko iry'umwaka ushize wa 2020 n'irya 2019 ari we wari wayegukanye, iki gikombe cyabaye icya munani muri Autraliana Open, kiba icya 18 mu marushanwa akomeye ku Isi mu mukino wa Tennis, azwi nka "Grand Slam".

Djokovic arabura ibikombe bibiri agashyikira Rafael Nadal na Roger Federer bafite ibikombe 20 muri Grand Slam.

Nyuma yo kwegukana igikombe ku nshuro ya gatatu, Djokovic yagize ati "Mu kwezi kumwe mbere y'uko irushanwa ritangira gukinwa muri Australia, hari urujijo ku bakinnyi ba Tennis".

"Ntabwo byari byoroshye, byari bigoye cyane, gusa twashimira abateguye iri rushanwa bagatuma riba".

Ijambo rya nyuma Djokovic yavuze yarigeneye abafana bari bitabiriye uyu mukino aho yagize ati:

"Buri munsi, mbakunda kurushaho".

Nyuma yo kwegukana iri rushanwa, Djokovic yongereye amanota bituma ashimangira umwanya wa mbere ku Isi mu mukino wa Tennis mu bagabo, n'ubundi yari asanzwe yicayeho.

Djokovic yitwaye neza mu mukino bituma yegukana igikombe atsinze seti 3-0


Medvedev yagowe cyane na nimero ya mbere ku Isi muri Tennis


Wari umukino utoroshye ku mpande zombi

Umukino warangiye Djokovic yegukanye intsinze

Djokovic yegukanye igikombe ku nshuro ya gatatu yikurikiranya





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND