RFL
Kigali

Manchester City yaciye amarenga yo kwegukana Premier League, AC Milan na Juventus zatsikiye, mu gihe FC Barcelona yatanze isomo rya ruhago! Ayavugwa i Burayi

Yanditswe na: SAFARI Garcon
Taliki:15/02/2021 11:35
0

Mu mpera z'icyumweru twasoje ku mugabane w'i Burayi mu bihugu bitandukanye hakinwaga imikino ya shampiyona, aho amakipe arimo Juventus, AC Milan na Liverpool zatunguwe, mu gihe FC Barcelona, Inter Milan na Manchester City zatanze ubutumwa bukomeye ku makipe bahanganiye igikombe mu bihugu byabo.



U Bwongereza: Premier League

Ntabwo bikomeje kugendekera neza Liverpool n'umutoza Jurgen Klopp watsinzwe na Leicester City 3-1, uba umukino wa gatatu wikurikiranya iyi kipe yegukanye igikombe cy'umwaka ushize itsindwa.

Gutsindwa uyu mukino byaciye amarenga ko kuzasoza mu makipe ane uyu mwaka bishobora kuzagorana dore ko yasatiriwe cyane n'amakipe atatu ayikurikiye, ayirya isataburenge.

Manchester City yatsinze Tottenham 3-0, bituma ishyira intera igaragara hagati yayo n'amakipe ayikurikiye, ndetse inatanga ubutumwa bukomeye ko ishaka kandi ifite amahirwe menshi yo kwegukana igikombe cy'uyu mwaka.

Muri uyu mukino umudage Ilkay Gundogan yongeye kwigaragariza Isi yose ko ariwe rufunguzo rw'intsinzi y'iyi kipe muri iyi minsi, nyuma yo gutsinda ibitego bibiri bituma ariwe mukinnyi uhetse Guardiola ndetse ufite n'intego yo kuyihesha igikombe uyu mwaka.

Arsenal yatsinze Leeds United 4-1, Aubameyang yongera kwigaragaza atsinda ibitego bitatu ndetse iyi kipe ikura ku mwanya Leeds yari yicayeho, ihita ijya ku mwanya wa 10.

Bruno Fernandez yongeye gufasha Manchester United mu mukino yanganyije na West Bromwich Albion 1-1, bituma uyu mukinnyi agira uruhare rw'ibitego 38 mu mikino 38 amaze gukinira Manchester United.

U Butaliyani: Serie A

Ikipe ya AC Milan yatunguwe na Spezia iyitsinda ibitego 2-0, ihita itakaza umwanya wa mbere.

Juventus nayo yatsindiwe mu mujyi wa Naples n'ikipe ya Napoli 1-0, bituma ikonkoboka igera ku mwanya wa kane, bigabanya amahirwe yo kwegukana igikombe cya shampiyona uyu mwaka.

Inter Milan ibifashijwemo na Romelu Lukaku, yatsinze Lazio 3-1 ihita ifata umwanya wa mbere w'agateganyo muri iyi shampiyona, aho irusha AC Milan bahanganiye igikombe inota rimwe.

Espagne:  LaLiga Santander

Ibifashijwemo na Lionel Messi, FC Barcelona yanyagiye Deportivo Alaves 5-1, bituma ikomeza kwiruka inyuma ya Real Madrid ntetse na Atletico ziri imbere muri iyi shampiyona.

Real Madrid yari imaze igihe yitwara nabi, yatsinze Valencia 2-0, bituma igaruka muri kuruse y'igikombe uyu mwaka.

U Bufaransa: Ligue 1

Lille yatsikiye imbere ya Brest banganya 0-0 bituma isatirwa na PSG yo yatsinze Nice 2-1, bituma ikinyuranyo hagati y'aya makipe gisigara ari inota rimwe gusa.

Lyon nayo yari ifite amahirwe yo guhita ifata umwanya wa mbere, yatsikiye mu rugo itsindwa na Montpellier 2-1, iguma ku mwanya wa gatatu.

Gundogan akomeje gufasha cyane Manchester City ihabwa amahirwe yo kwegukana Premier League 2021

Bruno Fernandez akomeje kubera igisubizo Manchester United

Aubameyang yafashije Arsenal gutsinda Leeds United yicara ku mwanya wa 10

Lukaku yafashije Inter Milan gutsinda Lazio ifata umwanya wa mbere

Messi yongeye gutanga ubutumwa ko Barcelona ishaka igikombe cya shampiyona uyu mwaka





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND