Ishyamba si ryeru! Klopp ahangayikishijwe bikomeye no gusubira inyuma kwa Liverpool! Yongeye gutsindwa 3 na Leicester City

 Liverpool iri ku mwanya wa kane ku rutonde rwa shampiyona ya Premier League n'amanota 40 mu mikino 24 imaze gukina ikaba irushwa amanota arenga 10 na Manchester City iri ku mwanya wa mbere.

Iyi kipe imaze gutsindwa imikino itatu yikurikiranya iherutse gukina harimo n'uwa Leicester yatsinzwe kuri uyu wa gatandatu 3-1, kimwe mu bintu biteye ubwoba abafana n'abakunzi b'iyi kipe.

Klopp yagize ati: "Dusigaje imikino 14, irimo amanota menshi. Ntabwo icy'ingenzi ari aho abandi bahagaze cyangwa uko bizabagendekera. Icy'ingenzi ni ibitureba".

Liverpool mu mwaka ushize yegukanye igikombe cya shampiyona irusha ikipe iyikurikiye amanota 18.

Ariko muri rusange amanota yayo kuri buri mukino yaragabanutse cyane kurusha indi kipe iyo ari yo yose yo muri Premier League kuva mu kwezi kwa gatandatu umwaka ushize ubwo imikino yatangiraga gukinwa nta bafana bari ku kibuga.

Liverpool yugarijwe n'ikibazo cy'abakinnyi bavunitse bikomeye barimo ba myugariro Virgil van Dijk, Joe Gomez na Joël Matip.

Rutahizamu Diogo Jota w'ikipe y'igihugu ya Portugal, watsindiye Liverpool ibitego icyenda mu mikino 17 kuva yayigeramo avuye muri Wolves mu kwezi kwa cyenda mu mwaka ushize aguzwe amapawundi miliyoni 41, ntabwo arongera gukina kuva ku itariki ya 9 y'ukwezi kwa 12 kubera imvune.

Klopp yongeyeho ati: "Turabizi ko bitavuze ko nta cyo dushoboye na busa, ariko turabizi ko tugomba gutanga umusaruro mu bihe biri imbere kandi ni byo tuzagerageza kugeraho".

"Mvugishije ukuri sintega amatwi urusaku rujyanye n'ibiva mu mikino. Ibyo mwanditse ibyo ari byo byose, sinigeze mbisoma. Ariko nzi uko ibintu bimeze kandi mvuga ku bijyanye n'ibiva mu mikino".

"Nubwo nzi impamvu tutarimo kwitwara neza, [mba] niteze ko dutsinda imikino myinshi kurusha iyo twatsinze".

"Icyo ni cyo kimpangayikishije".

"Tuzagerageza uko dushoboye kose kugira ngo twitware neza cyane bishoboka muri uyu mwaka guhera ubu. Tuzabiharanira. Ako ni ko kazi kacu".

LIVERPOOL YONGEYE GUTSINDWA UMUKINO WA GATATU YIKURIKIRANYA NA LEICESTER CITY 3-1

Umunyezamu Alisson na ba myugariro ba Liverpool bagize akazi gakomeye mu gice cya kabiri ubwo Leicester yatsindaga Liverpool ikajya ku mwanya wa kabiri muri shampiyona ya Premier League.

Igitego cya Mohamed Salah ku ishoti yo ku munota wa 67 cyatumye Liverpool iba imbere, ariko kiza kwishyurwa na James Maddison ku munota wa 78 ku mupira w'umuterekano.

Leicester yashyizemo icya kabiri iminota itatu nyuma yaho ubwo habagaho guhuzagurika hagati ya Alisson na myugariro w'umutangizi Ozan Kabak, bigatuma Jamie Vardy ashyira umupira mu izamu ririmo ubusa.

Habura iminota itanu ngo umukino urangire, Harvey Barnes yashyizemo icya gatatu ari na cyo cya nyuma cya Leicester muri uwo mukino.

Gutsinda uyu mukino byatumye Leicester City ifata umwanya wa kabiri, mu gihe  gutsindwa kwa Liverpool ku nshuro ya gatatu yikurikiranya kuvuze ko kuba yasoza uyu mwaka iri mu myanya ine ya mbere bisa nk'ibikigoranye.

Klopp avuga ko adateze gutega amatwi abavuga ku isubira inyuma ku ikipeb ye

Liverpool yongeye gutaka umukino wa gatatu yikurikiranya itsindwa na Licester 3-1