Ari imbere mu bafatiye runini Espagne! Ibyahishwe ku masezerano ya Messi muri Barcelone byagiye hanze

Mu minsi ishize nibwo ikinyamakuru El Mundo cyashyize ahagaragara kontaro ya Lionel Messi itandukanye n'ibyatangazwaga n'ikipe akinira ndetse nawe ubwe. Aya masezerano y'imyaka 4 yasinye mu 2017 azarangira mu mpeshyi 2021, agaragaza ko Messi azasaruramo akayabo ka miliyoni 555 z'ama-Euros.

Nkuko byatangajwe na El Periodico de Catalunya, havumbuwe ko uyu mukinnye yatanze umusoro wa Miliyoni 370 z'ama-Euros mu gihe cy'imyaka 4, bimugira umwe mu bantu batanze umusanzu ukomeye mu gihugu akinamo cya Espagne.

Aha hakubiyemo Miliyoni 275 z'imisoro isanzwe, ndetse ukongeraho n'indi misoro itandukanye yishyuwe. Muri miliyoni 138 z'ama-Euros uyu mukinnyi asanzwe yinjiza ku mwaka, yiashyuramo Miliyoni 70 z'imisoro buri mwaka.

Ibi byose iyo bikusanyijwe, Messi aza ku rutonde imbere rw'abantu bafatiye runini igihugu cya Espagne kubera imisoro yishyura ifasha iki gihugu n'abagituye.