RFL
Kigali

Manchester City yanyagiye Liverpool ishimangira umwanya wa mbere yongera amahirwe yo kwegukana Premier League - AMAFOTO

Yanditswe na: SAFARI Garcon
Taliki:7/02/2021 23:13
0


Ikipe ya Manchester City yasanze Liverpool mu rugo iyihatsindira ibitego 4-1, mu mukino w'umunsi wa 23 muri shampiyona y'u Bwongereza, byongerera amahirwe iyi kipe y'i Manchester kwegukana igikombe cya Premier League uyu mwaka dore ko yashyizemo ikinyuranyo cy'amanota atanu ku ikipe iyikurikiye.



Ku mugoroba wo kuri iki cyumweru tariki ya 07 Gashyantare 2021, yari amarira menshi mu mujyi wa Liverpool byumwihariko ku bafana ba Liverpool FC, nyuma yo gusuzugurirwa mu rugo na Manchester City bahanganira igikombe, ikabatsinda itabababariye ibitego 4-1.

Manchester City yakinnye umupira mwiza ndetse irusha Liverpool kugerageza amahirwe yo gutsinda mu minota 45 y'igice cya mbere, ariko irangira nta kipe irebye mu izamu ry'indi.

Igice cya kabiri cyatangiye Manchester City igaragaza gusatira cyane ndetse n'inyota yo gufungura amazamu.

Ku munota wa 49 umudage  Ilkay Gundogan yafunguye amazamu atsindira Man. City igitego cya mbere, gusa ku makosa yari akozwe na  Ruben Dias Mohamed Salah yishyuye igitego kuri Penaliti yateye ku munota wa 63.

Nyuma y'iminota 10 Manchester City isatira cyane, Gundogan yatsindiye Manchester City igitego cya kabiri ku munota wa 73 ku mupira mwiza yahawe na  Phil Foden.

Nyuma y'iminota itatu gusa, ku munota wa 76 Umwongereza ukunda guheka cya ne Manchester City,  Raheem Sterling yatsinze igitego cya gatatu ku mupira mwiza yahawe na Bernardo Silva, Manchester City ikomeza kuyobora umukino.

Habura iminota 7 ngo umukino urangire,  Phil Foden yatsinze igitego cy'agashinguracumu cya kane ku mupira yahawe na Gabriel Jesus.

Gutsinda uyu mukino byafashije Manchester City gushimangira umwanya wa mbere n'amanota 50 mu mikino 22, bahita basiga mukeba Manchester United amanota 5 kandi bo bamaze gukina imikino 23, mu gihe Liverpool yahise ijya ku mwanya wa kane n'amanota 40.

Umukino waherukaga guhuza aya makipe mu Ugushyingo 2020, bombi bari baguye miswi 1-1.

Ubaye umukino wa kabiri wikurikiranya Liverpool ifite igikombe cy'umwaka ushize itsinzwe muri shampiyona y'u Bwongereza, nyuma yuko umukino uheruka yari yatsinzwe na Brighton 1-0.

Manchester City ishaka igikombe cya 7 cya Premier League, yujuje umukino wa 14 wikurikiranya idatsindwa muri shampiyona y'u Bwongereza muri uyu mwaka w'imikino, umwaka ushize ikaba yari yasoje ku mwanya wa kabiri muri shampiyona.

Gundogan yigaragaje muri uyu mukino atsinda ibitego bibiri

Sterling nk'ibisanzwe yatsindiye Manchester City

Foden yatsinze icy'agashinguracumu

Mo Salah yatsinze igitego cy'impozamarira ku ruhande rwa Liverpool





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND