Kigali

Mirafa wakiniraga Rayon Sports yasinyiye Zanaco ifite ibikombe 7 bya shampiyona muri Zambia

Yanditswe na: SAFARI Garcon
Taliki:5/02/2021 12:15
0


Umunyarwanda ukina mu kibuga hagati wakiniraga Rayon Sports, Nizeyimana Mirafa, yamaze gusinya amasezerano y'imyaka ibiri mu ikipe y'ubukombe muri Zambia ya Zanaco FC, inayoboye urutonde rwa shampiyona y'uyu mwaka.



Mirafa yahagurutse mu Rwanda tariki ya 17 Ugushyingo 2020, yerekeza mu igeragezwa muri Zambia aho byavugwaga ko agiye muri Napsa Stars yakinnye CAF Confederations Cup uyu mwaka.

Gusa akigerayo uyu mukinnyi yahise abengukwa n'ikipe ya Zanaco, ihita inafata iyambere imuha amasezerano y'imyaka ibiri agiye kuyikinira.

Byavugwaga ko Mirafa agomba kugurwa 20.000$, Rayon Sports agifitiye amasezerano y’umwaka umwe igahabwa 7000$.

Mirafa yari umaze umwaka umwe akinira Rayon Sports nyuma yo gutandukana na APR FC.

Zanaco FC Mirafa agiye gukinira ifite amateka akomeye mu gihugu cya Zambia ndetse no muri Afurika muri rusange.

Iyi kipe ifite ibikombe 7 bya shampiyona muri Zambia, icyo iheruka yacyegukanye mu 2016, ndetse ikaba ikunze no kwitabira amarushanwa nyafurika ya CAF Champions League ndetse na Confederations Cup.

Iyi kipe yashinzwe mu 1985, ikinira ku kibuga cya Sunset Stadium gihetrereye mu murwa mukuru wa Lusaka, kikaba cyakira abantu ibihumbi 10.

Iyi kipe kandi itozwa n'umutoza Chris Kaunda, akaba yungirijwe na Joel Bwalya.

Zanaco FC niyo iyoboye urutonde rwa shampiyona y'uyu mwaka nyuma y'imikino 15, aho ifite amanota 25 inganya n'amakipe atatu ayikurikiye.

Mirafa yakiniye amakipe atandukanye yo mu Rwanda arimo Etincelles FC, Police FC ndetse na APR FC.

Mirafa yavuye mu Rwanda mu Ugushyingo yerekeza mu igeragezwa muri Zambia

Mirafa yari amaze umwaka umwe akinira Rayon Sports






TANGA IGITECYEREZO

Izina ryawe
Email yawe
Andika igitecyerezo


Safari

Inyarwanda BACKGROUND