Iyambonye Arcade yakoze indirimbo ku gitabo kigaragaza ubuzima bwihariye bw’Intwari Niyitegeka Felicita-VIDEO

Iki gitabo cya Padiri Dusengumuremyi kivuga ku mateka y'ubuzima bw'Intwari Niyitegeka Felicita wishwe muri Jenoside yakorewe Abatutsi mu Rwanda muri Mata 1994, azira guhisha no kurokora bamwe mu bahigwaga.

Kivuga ko n'ubwo Félicita yapfuye nk’intwari azira gushaka gukiza abari bamuhungiyeho ntibyamugwiririye kuburyo hari abatekereza ko byabaye nk’impanuka ahubwo impuhwe, urukundo no kwita ku bari mu kaga ni umuco yatojwe kuva mu buto bwe arabikurana.

Muri Werurwe 2013, ni bwo Iyambonye yahimbye iyi ndirimbo ‘Uwahiriwe’ agendeye ku gitabo cya Padiri Dusengumuremyi. Ayiririmba muri Kanama 2013, yongera kuyisubiramo muri Nyakanga 2020 ari nabwo yafata amashusho yayo inandikwa ku buryo bw’amanota.

Muri iyi ndirimbo ntiyavuze iby’urupfu rwa Felisita gusa ahubwo yamuvuze ahereye ku ivuka rye kuko ubuzima bwa Felisita bwasigiraga isomo uwo bahuraga wese.

Ubutumwa buri muri iyi ndirimbo ni kugaragaza uburyo Imana yateguye Felisita akivuka noneho abifashijwemo n’ababyeyi be agahabwa uburere bwa Gikiristu bumufasha kubera ingenzi abo yabanye na bo bose kugeza n’ubwo yishwe azira kugira neza.

Iyambonye Arcade ni umwe mu bagize Urunana rw'inshuti za Felicita Niyitegeka. Ni umuririmbyi n'umunyamuziki muri Chorale Christus Regnat yo muri Paruwasi Regina Pacis.

Mu mishinga ya vuba, uyu muhanzi afite harimo gukora indirimbo igizwe n’amagambo Felicita yavuze mu minsi ye ya nyuma abwira abari bamuhungiyeho ndetse n’ayo yabwiye abicanyi yanga kwitandukanya n’abahigwaga. Aho ni ku ruhande rw ubuhanzi. Hari n’imishinga y’ihuriro ry’inshuti za Felisita.

Iyambonye yabwiye INYARWANDA ko afite intego yo kurushaho kumenyekanisha ubutwari n'ubumuntu bya Felicita ku isi hose binyuze mu nyandiko no mu biganiro bigamije kurandura amacakubiri ayari yo yose mu bantu.

Gushyira mu ndimi zinyuranye ibitabo byanditswe kuri Felicita: kugeza ubu biboneka mu Kinyarwanda, Igifransa, icyongereza bidatinze kizashyirwa mu Kidage n'Icyespanyoro mu rwego rwo gusangiza Isi yose ubutumwa bwiza bwo kwimika ubumuntu mu bantu.

Ku buryo buhoraho kandi harateganywa kubaka icyiswe ‘Umubiri wa Felicita N’, aho urunana rw'inshuti ze zifatanyije n’abandi bantu biyumvamo umutima ugira neza bazagerageza kumubera aho atari bakora bimwe mu bikorwa by’impuhwe byamuranze ndetse no kugaragaza isura ye muri rubanda hamaganwa amacakubiri, ivangura n’ihezwa.

Hari no gukomeza kumukoraho ubushakashatsi buzashingirwaho hasabwa ko yashyirwa mu rwego rw'Abatagatifu bikozwe na Kiliziya Gatolika.

Mu buryo bw’amajwi iyi ndirimbo ‘Uwahiriwe’ yakozwe na Emmy Pro naho amashusho (Video) yatunganyijwe na Aime Pride muri Universal Records.

Iyambonye Arcade yakoze indirimbo ku buzima bw'Intwari Niyitegeka Felecita agendeye ku gitabo cya Padiri Dusengumuremyi Jean D'Amour

Abaririmbyi bakomeye bafatanyije n'umuhanzi Iyambonye kuririmba ku buzima bwa Niyitegeka waranzwe n'ibikorwa by'urukundo no kwitangira abandi

Umuhanzi Iyambonye Arcade yihaye intego zikomeye zirimo no gukora indi ndirimbo ivuga ku magambo akomeye yavuzwe na Niyitegeka Felicita

Padiri Dusengumuremyi Jean D'Amour ni we wasabye Iyambonye Arcade gukora indirimbo kuri iki gitabo

KANDA HANO UREBE AMASHUSHO Y'INDIRIMBO 'UWAHIRIWE' Y'UMUHANZI IYAMBONYE ARCADE

">