Kigali: MINEDUC yafunze amashuri yose y'incuke, abanza n'ayisumbuye iyashishikariza kwiga akoresheje ikoranabuhanga

Minisiteri y'Uburezi yavuze ko aya mashuri afunzwe kuva kuwa Mbere tariki ya 18/01/2021. Icyakora abanyeshuri bo mu Ntara bo bazakomeza amasomo yabo. Ni mu gihe kuri uyu wa Mbere ku itariki tuvuze haruguru ari bwo abanyeshuri bo mu mashuri y'incuke n'abo mu cyiciro cya mbere cy'amashuri abanza bari gutangira kwiga, ariko kugeza ubu amashuri twavuze haruguru yo muri Kigali yafunzwe kubera ubwiyongere bw'icyorezo cya Covid-19.

Itangazo rya MINEDUC riragira riti "Amashuri y'incuke, abanza n'ayisumbuye (Aya Leta y'ayigenga) abarizwa mu mujyi wa Kigali arafunze kuva kuwa Mbere tariki ya 18 Mutarama 2021. Amashuri arashishikarizwa kwiga hakoreshejwe ikoranabuhanga aho bishoboka hose. Abanyeshuri biga bacumbikirwa mu mujyi wa Kigali bazaguma mu bigo byabo, bakomeze guhabwa serivisi z'ingenzi. Amashuri yose atabarizwa mu mujyi wa Kigali azakomeza kwiga uko bisanzwe, hubahirizwa amabwiriza yo kwirinda Coronavirus.

Minisiteri y'Uburezi yavuze ko izi ngamba zizavugururwa nyuma y'ibyumweru bibiri hamaze gukorwa isesengura ry'uko icyorezo cya Coronavirus kizaba cyifashe. MINEDUC ifashe uyu mwanzuro mu gihe icyorezo cya Covid-19 gikomeje gufata intera mu Rwanda akaba ari nayo mpamvu mu minsi micye ishize hafashwe gahunda ya 'Guma mu Karere' na 'Guma muri Kigali'. 

Itangazo rya Minisiteri y'Ubuzima ryo ku mugoroba w'iki Cyumweru rigaragaza ko mu masaha 24 ashize habonetse abantu 182 basanzwemo Covid-19, abakize ni 170, abapfuye ni babiri. Kuva iki cyorezo cyagera mu Rwanda mu ntangiriro za 2019, kugeza ubu abanduye bose hamwe bararenga ibihumbi 11 (11,032), abakize ni 7,363, abakirwaye ni 3,527 naho abahitanywe nacyo ni abantu 142.

Amashuri y'incuke, abanza n'ayisumbuye yafunzwe