Kigali

Kiyovu Sports yahagaritse amasezerano y'abakozi bayo nyuma y'uko shampiyona ihagaritswe

Yanditswe na: SAFARI Garcon
Taliki:15/01/2021 17:21
0

Kiyovu Sports yabaye ikipe ya mbere yatangaje ko yahagaritse amasezerano y'abakozi bayo, nyuma y'uko shampiyona y'icyiciro cya mbere mu Rwanda ihagaritswe igeze ku munsi wa gatatu, bitewe n'uko ubwandu bwa Coronavirus bwari bukomeje kwiyongera mu makipe.



Shampiyona y'icyiciro cya mbere mu Rwanda yahagaritswe mu Ukuboza 2020, nyuma y'uko amakipe menshi yari amaze kugaragaramo abarwayi ba COVID-19, kugeza magingo aya ntiharamenyekana igihe izasubukurirwa.

Amenshi mu makipe yatangaje ko ubukungu bwayo butifashe neza kubera iki cyorezo, gusa bagitegereje umwanzuro wa Minisiteri ya Siporo 'MINISPORTS' ku isubukurwa rya shampiyona kugira ngo nabo bafate umwanzuro ku guhagarika amasezerano y'abakozi babo.

Ntabwo Kiyovu Sports yarindiriye icyo gihe, kuko yamaze gutangaza ko yahagaritse amasezerano y'abakozi bayo kugeza igihe hazatangazwa igihe shampiyona izasubukurirwa. Mu butumwa yanyujije ku rukuta rwayo rwa Twitter, yatangaje ko izakomeza gukora ibishoboka byose kugira ngo ifashe abakinnyi bayo kubaho.

Yagize iti "Dushingiye ku cyemezo cya FERWAFA cyo gusubika amarushanwa ya shampiyona kuva kuwa 12 Ukuboza 2020, ubuyobozi bwa Kiyovu Sports bwafashe umwanzuro wo gusubika amasezerano y’abakozi kugeza igihe irindi tangazo risubukura amarushanwa rizazira.

Ikipe izakomeza gushakisha uburyo bwo gufasha abakozi mu gihe bishoboka muri ibi bihe bigoye Isi yose. Turizera ko vuba ibikorwa bya siporo byongera kugaruka buri wese agasubira mu nshingano ze".

MINISPORTS yatangaje ko izafata icyemezo cyo gusubukura shampiyona igihe FERWAFA izagaragaza uburyo amakipe yiteguye kurinda abakinnyi bayo ndetse n'abandi bashobora kuza ku bibuga, kwandura icyorezo cya Coronavirus.

Mu mikino itatu Kiyovu Sports yakinnye mbere yuko shampiyona ya 2020/21 ihagarikwa, yari yatsinze umwe, itsindwa ibiri, yatsinze Mukura Victory Sports i Huye 3-0, itakaza imikino ibiri yakurikiyeho aho batsinzwe na Marines FC 3-0, ndetse na APR FC 1-0.

Itangazo rimenyesha ihagarikwa ry'amasezerano y'abakozi ba Kiyovu Sports

Kiyovu Sports yatsinzwe imikino ibiri muri itatu bakinnye mu mwaka w'imikino wa 2020/21





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND