Amajonjora y’ibanze ya Miss Rwanda 2021 yasubitswe

Irushanwa rya Miss Rwanda 2021 ryagombaga gutangirira mu Karere ka Rubavu mu Ntara y’Uburengerazuba, ku wa 09 Mutarama 2021. Rigakomeza ku wa 16 Mutarama 2021 mu Ntara y’Amajyaruguru mu Karere ka Musanze.

Inama y’Abaminisitiri yateranye mu ijoro ry’uyu wa Mbere tariki 04 Mutarama 2021, iyobowe na Minisitiri w’Intebe, Dr. Ngirente Edouard yavuze ko “Ingendo hagati y’Uturere dutandukanye tw’Igihugu no hagati y’Uturere n’Umujyi wa Kigali zirabujijwe.”

Inama y’Abaminisitiri yavuze ko izi ngamba zitangira gukurikiza guhera kuri uyu wa kabiri tariki 05 Mutarama 2021 ‘kandi zizongera kuvugururwa nyuma y’iminsi 15 hashingiwe ku isesengura ry’inzego z’ubuzima’.

Rwanda Inspirationa Back Up (RIB) itegura irushanwa rya Miss Rwanda yasohoye itangazo ahagana saa mbili kuri uyu wa Kabiri tariki 05 Mutarama 2021 imenyesha ko "amajonjora y’ibanze yari ateganyijwe gutangira ku itariki 09 Mutarama 2021 mu Ntara y’Iburengerazuba abaye asubitswe, mu rwego rwo kubahiriza amabwiriza mashya yo kwirinda icyorezo cya Coronavirus nk’uko byemejwe n’Inama y’Abaminisitiri yo ku wa 04 Mutarama 2021.”

RIB yakomeje ivuga ko “Abategura irushanwa rya Miss Rwanda baha agaciro ubuzima bwiza bw’abitabira irushanwa rya Miss Rwanda ndetse n’Abanyarwanda muri rusange, akaba ariyo mpamvu banashishikariza Abaturarwanda bose gukomeza kubahiriza amabwiriza ashyirwaho n’inzego za Leta mu kwirinda no guhashya icyorezo cya Coronavirus.”

Abategura iri rushanwa bavuze ko abifuza kwitabira iri rushanwa bemerewe gukomeza kwiyandikisha banyuze ku rubuga rwa www.missrwanda.rw. Bavuga ko ‘indi gahunda n’amatiriki y’ibikorwa by’iri rushanwa muzabimenyeshwa mu gihe cya vuba’.

Amajonjora y'ibanze y'irushanwa rya Miss Rwanda 2021 yasubitswe kubera Covid-19

Hari gushakishwa umukobwa uzasimbura Nishimwe Naomie Miss Rwanda 2020