Kigali

Nkoraho! Rema wo muri Uganda yaririmbye Ikinyarwanda aterana imitoma na The Ben mu ndirimbo nshya-YUMVE

Yanditswe na: Janvier Iyamuremye
Taliki:25/12/2020 18:39
0


Umuhanzikazi Rema Namakula uri mu bakomeye muri Uganda, yasohoye indirimbo nshya yitwa ’This is Love’ yakoranye n’umuhanzi w’umunyarwanda Mugisha Benjamin [The Ben], abantu batandukanye bagaragaza ko banyuzwe nayo.



Rema ufite indirimbo zirebwa n’umubare munini zirimo ‘Ekyama’ yari amaze iminsi micye araritse abafana be n’abakunzi b’umuziki muri rusange, ko yitegura gusohora indirimbo yakoranye n’umuhanzi wo mu Rwanda. Yabanje gusaba abafana be kumufora mbere y’uko amutangaza.

Yavugaga ko ari ibyishimo bidasanzwe kuri we kuba yakoranye indirimbo na The Ben akarenzaho ko anishimiye kuyisangiza abakunzi be. Ni mu gihe The Ben nawe yararikaga abafana be, ko mu masaha y’umugoroba w’uyu wa Gatanu indirimbo ye yakoranye na Rema isohoka.

The Ben na Rema Namakula baririmba buri umwe atera undi imitoma. The Ben abwira Rema ko atazamusiga, undi nawe akamusaba kumwegera.

The Ben akomeza abwira Rema kumuhata urukundo, ndetse ko iyo agiye kure ye yibaza niba ari bugaruke. Akamusezeranya ko azamubera ingabo imukirangira. Rema nawe abwira The Ben kumuha urukundo ndetse ko atazigera amusiga.

Uyu muhanzikazi wakunzwe mu ndirimbo zitandukanye zirimo n’izo yakoranye n’itsinda rya B2C aririmba Ikinyarwanda agira ati “Nkoraho, nkoraho. Ibyanjye byose ni ibyawe.”

Iyi ndirimbo isohotse mu gihe The Ben ari kubarizwa muri Zanzibar nyuma yo guca muri Tanzania. Byavuzwe ko muri Tanzania yari kumwe n’umukunzi we Pamella Uwicyeza witabiriye Miss Rwanda 2019.

The Ben yari yabwiye KT Press, ko yamaze gukodesha inzu muri Zanzibar ndetse ko ari ho azakorera imishinga ye y’indirimbo irimo n’iyo yakoranye na Rema na Uncle Austin.

Byari biteganyijwe ko iyi ndirimbo isohokana n’amashusho ariko siko byagenze. Iyi ndirimbo kandi isohotse mu gihe hari amakuru avuga ko Uncle Austin nawe azaririmbamo, ariko siko biri kuko Uncle Austin yabwiye INYARWANDA, ko hari indi ndirimbo afitanye na The Ben atari iyi Rema yasohoye.

Iyi ndirimbo ya The Ben na Rema yatunganyijwe mu buryo bw’amajwi na Producer Nessim uri mu bakomeye. Producer Nessim wakoze iyi ndirimbo ni we watunganyije izimo ‘Gutamiza’, ndetse yakoranye n’abahanzi barimo Pius, Charly&Nina, Radio&Weasel, Ykee Benda, Urban Boyz, B2C n’abandi.

The Ben agiye muri Zanzibar nyuma y’iminsi mike asohoye indirimbo zirimo ‘Umutoso’ yakoranye na Muchoma na ‘For Real’ yakoranye na Igor Mabano wo muri Kina Music.

Uyu muhanzi wamaze imyaka icumi akorera muzika ye muri Leta Zunze Ubumwe za Amerika, anaherutse gusinya amasezerano yo kwamamaza telefoni za Tecno. Amezi atatu arashize asohoye indirimbo yise ‘Kola’ yaje ikurikira izirimo ‘Ibyiringiro’, ‘Suko’, ‘Vazi’, Ndaje’ n’izindi.

Rema wo muri Uganda yasohoye indirimbo 'This is love' yakoranye na The Ben wo mu Rwanda

Umuhanzikazi Rema yavuze ko yishimiye gukorana indirimbo na The Ben

The Ben uri kubarizwa muri Zanzibar yagaragaje ibyishimo nyuma y'uko akoranye indirimbo na Rema

KANDA HANO UREBE AMASHUSHO Y'INDIRIMBO 'THIS IS LOVE' REMA YAKORANYE NA THE BEN






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND