Kigali

Baravumbuye! Chorale de Kigali yasanze kuririmbana agapfukamunwa ari byiza cyane kuko ijwi risohoka riyunguruye-VIDEO

Yanditswe na: Mupende Gedeon Ndayishimiye
Taliki:24/12/2020 16:04
0


Kuri uyu wa Kane tariki 24/12/2020 Chorale de Kigali irinjiza abanyarwanda muri Noheli mu gitaramo gikomeye kibera kuri Televiziyo Rwanda no kuri shene yabo ya Youtube. Mbere y'uko iki gitaramo kiba, twifuje kubagezaho icyo iyi korali iherutse gutangaza ku bijyanye no kuririmba wambaye agapfukamunwa.



Mu kiganiro n'abanyamakuru cyo kuwa 12/12/2020 ubwo Chorale de Kigali yiteguraga gutaramira muri Kigali Arena tariki 19/12/2020 iri kumwe n'abakunzi bayo imbonankubone, bikarangira iki gitaramo gihagaritswe mu kwirinda Covid-19, Abayobozi b'iyi korali babajijwe niba kuririmba bahanye intera banambaye agapfukamunwa bitazababera imbogamizi mu gitaramo cyabo, batangaza ko nta kibazo na kimwe bizabatera ahubwo ko basanze bizabafasha cyane.

Chorale de Kigali yaboneyeho gutangaza ibijyanye n'ubuvumbuzi ku bijyanye no kuririmbana agapfukamunwa. Bavuze ko n'ubwo icyorezo cya Covid-19 cyasubije inyuma ibikorwa byinshi ku Isi, ariko ko hari ibyo iki cyorezo kigishije abantu. Hodari Jean Claude Visi Perezida wa kabiri wa Chorale de Kigali ushinzwe imiririmbire n'imyitwarire, ubwo yasubizaga ikibazo cyari kibajijwe na Epa Ndungutse wa Radio Rwanda, yavuze ko bavumbuye ko kuririmbana agapfukamunwa bituma ijwi ryumvikana neza cyane kurusha kuririmba nta gapfukamunwa wambaye. Yagize ati:

Twabajije abatekinisiye bacu babizi, baravuga bati 'ahubwo ibyo ni byo byiza', burya muri tekinike zo kuririmba, n'umwuka uhita ukubita kuri mikoro ubwawo uzana ikintu cy'igihu mu ijwi, ariko iyo agapfukamunwa kawuyunguruye bigera kuri mikoro bisohoka neza ari ijwi ryonyine ku buryo rwose metero imwe n'agapfukamunwa ubwabyo ni ikintu twumva kitabangamye na gato, ahubwo bifite byinshi bimaze, harimo byinshi/ubwenge Covid-19 yagize yigisha abantu.

Chorale de Kigali yatangaje ko yasanze kuririmbana agapfukamunwa ntako bisa

N'ubwo igitaramo bari gukorera muri Kigali Arena bari kumwe n'abakunzi babo cyahagaritswe, ku mugoroba w'uyu wa Kane iyi korali irakora igitaramo yifashishije ikoranabuhanga, kikaba kiri butambuke kuri Televiziyo y'Igihugu. Nk'uko amabwiriza ya Minisiteri y'Ubuzima yo kwirinda Covid-19 avuga, guhana intera ya metero imwe no kwambara agapfukamunwa ni ngombwa no ku baririmbyi. Aho agapfukamunwa gashobora kudakoreshwa ni igihe abaririmbyi bahanye intera ya metero ebyiri.

Kuba Chorale de Kigali yaratangaje ko kuririmbana agapfukamunwa basanze bituma ijwi risohoka neza, ushobora kugira amatsiko y'uko bari buze kuba bameze mu gitaramo bakora ku mugoroba w'uyu wa Kane. InyaRwanda yamenye amakuru avuga ko aba baririmbyi bari bugaragare bambaye agapfukamunwa-ibihuye neza n'ibyo batangaje ko kuririmbana agapfukamunwa ari byiza cyane kuruta kutakaririmbana.

Iki gitaramo cya Chorale de Kigali kiraba kuri uyu wa Kane tariki 24/12/2020 kuva saa Tatu z'ijoro ku masaha y'i Kigali. Nk'uko Chorale de Kigali yabitangaje ikoresheje urubuga rwa Twitter, abantu bazakurikira iki gitaramo mu buryo bw'ikoranabuhanga aho gitambuka kuri Televiziyo Rwanda ndetse no kuri shene ya Youtube y'iyi korali. Ni igitaramo bagiye gukora nyuma y'igihe kinini bitegura gutaramana n'abanyarwanda muri 'Christmas Carols Concert 2020'.

Banditse bati "Ni ku itariki ya 24 Ukuboza 2020, i saa Tatu z'umugoroba. Uzakurikirana igitaramo "Christmas Carols Concert" Live kuri RTV ndetse no kuri Youtube channel ya Chorale de Kigali. Ntimuzacikwe". Aba baririmbyi bazakora iki gitaramo bari muri Kigali Arena ndetse ubuyobozi bw'iyi nyubako bwabishimangiye buvuga ko aba baririmbyi b'amajwi atangaje bazakora iki gitaramo bamurikiwe n'amatara ya Kigali Arena.

Hodari Jean Claude umwe mu bayobozi ba Chorale de Kigali, mu kiganiro iyi korali iherutse kugirana n'abanyamakuru mbere y'uko igitaramo bari gukorera muri iyi nyubako bari kumwe n'abakunzi babo gisubikwa, yavuze ko bamaze igihe kinini bitegura kwifatanya n'abanyarwanda kwizihiza Noheli no kwinjira mu mwaka mushya wa 2021.

Chorale de Kigali yashinzwe mu 1966. Igizwe n’abanyamuryango basaga 150, abarenga 80% bakaba ari urubyiruko. Ni Chorale imaze kumenyekana cyane mu Rwanda ndetse no mu mahanga, kubera indirimbo zihimbanywe kandi zikaririmbanwa ubuhanga igenda igeza ku bakunzi bayo haba mu bitaramo, muri gahunda zitandukanye iririmbambo ndeste n’izo ibagezaho kuri shene yabo ya Youtube. Intego yabo nyamukuru bandikishije no mu Urwego rw'Igihugu rw'Imiyoborere, RGB, ni uguteza imbere umuziki wanditse ku rwego mpuzamahanga.


Mu masaha make Chorale de Kigali irinjiza abanyarwanda muri Noheli

REBA IKIGANIRO CHORALE DE KIGALI YATANGARIJEMO IBYO KURIRIMBANA AGAPFUKAMUNWA


VIDEO: Shema Aime Patrick - InyaRwanda.com






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND