Andi makipe abiri yagaragayemo abakinnyi banduye COVID-19

Nyuma y'isubikwa rya shampiyona y'icyiciro cya mbere hakinwe imikino itatu gusa, Minisiteri ya siporo yategetse Ishyirahamwe nyarwanda rya ruhago 'FERWAFA' gupimisha abakinnyi b'amakipe yose yo mu cyiciro cya mbere, ubundi abakinnyi bakajya mu ngo zabo mbere y'uko hasohoka itangazo riha amakipe uburenganzira bwo gusubira imyitozo.

Amakipe menshi yarabikoze, ndetse ayasuzumwe mbere bagasanga abakinnyi ari bazima bahise boherezwa mu ngo zabo. Kuri uyu wa Mbere tariki ya 21 Ukuboza 2020, hamenyekanye amakuru y'uko amakipe abiri yo mu ntara zitandukanye yagaragayemo abakinnyi banduye Coronavirus mu bipimo biheruka gufatwa.

Amakuru ava mu bari hafi y'ikipe ya Musanze FC yo mu karere ka Musanze, avuga ko abakinnyi 10 b'iyi kipe basanzwemo Coronavirus bituma iyi kipe iguma mu kato kugira ngo abakinnyi batasanzwemo iki cyorezo basuzumwe mbere yo koherezwa mu ngo zabo.

Indi kipe yasanzwemo Abakinnyi banduye Coronavirus, ni AS Muhanga, aho abari hafi y'iyi kipe batangarije InyaRwanda.com ko abakinnyi batanu banduye iki cyorezo, byatumye ikipe yose iguma mu kato, mu gihe hagitegerejwe gupimwa indi nshuro kugira ngo abakinnyi badafite iki cyorezo boherezwe mu miryango yabo.

Musanze FC na AS Muhanga ziyongereye ku yandi makipe arindwi yamaze kugaragaramo Abakinnyi banduye icyorezo cya Coronavirus, harimo Rayon Sports, APR FC, AS Kigali, Marines FC, Rutsiro FC, Amagaju FC na Alpha FC.

Ku wa kane tariki ya 24 Ukuboza 2020, hateganyijwe inama izahuza FERWAFA n'amakipe 16 akina icyiciro cya mbere, izibanda ku gikwiye gukorwa kugira ngo shampiyona isubukurwe.

Musanze FC yagaragayemo abakinnyi 10 banduye banduye Coronavirus