Iri ku rwego rwa Nigeria! Davis D wasohoye indirimbo 'Bon' yavugishije benshi ashobora gutaramira i Burundi - VIDEO

Nta masaha arenze abiri indirimbo Bon ya Davis D igiye hanze mu buryo bw’amajwi n’amashusho. Mu kiganiro kigufi InyaRwanda.com yagiranye na Bagenzi Bernard ureberera inyungu za Davis D, yasobanuye ko ari indirimbo yakorewe i Dubai ikaba irimo umunyamideri usanzwe ukora ako kazi ko kugaragara mu ndirimbo.

Ku kijyanye n’amafaranga Bernard yirinze kuvuga ayayishowemo ariko yasobanuye ko ihenze cyane, ati ”Na we urayibona ko iri ku rwego ruhambaye”. Bernard nyiri Incredible irimo abahanzi barimo na Davis D yasobanuye ko iyo ndirimbo ije yiyongera ku zindi zizaba ziri kuri Alabum “Afro killa” izasohoka umwaka utaha ikazaba iriho indirimbo 20.

Ese Davis D yiteguye kuyigeza hanze y’u Rwanda?

Bagenzi Bernard asobanura ko yamaze kuyishyikiriza amateleviziyo mpuzamahanga nka Trace n’izindi dore ko avuga ko iri ku rwego rumwe n’iz’abahanzi bo muri Nigeria. Ni indirimbo yasohotse itegerejwe na benshi nyuma y'inkuru zayibanjirije zivuga umubano udasanzwe wa Davis D n'umukobwa ugaragara muri iyi ndirimbo.

Mu minsi ishize InyaRwanda yakoze inkuru igaruka ku bahanzi bakunzwe i Burundi aho Davis D yari mu bakunzwe. Aya mahirwe rero Bagenzi Bernard avuga ko bamaze kwakira ubutumire bwinshi bubasaba ko uyu muhanzi yakwerekeza yo gutaramira abamukunda bose. Ati: "Corona nicogora Davis D azajya gutaramira i Burundi kuko twabisabwe kenshi”.

Turi mu bihe bidasanzwe aho abahanzi bari gukora ibitaramo kuri murandasi ariko Davis D iyo gahunda ntayikozwa kuko afite umuziki uri ku rwego rurenze urwo gutaramira abantu kuri murandasi nk'uko byatangajwe na Bagenzi.

">