Kigali

Paul Pogba ntiyishimye muri Manchester United agomba guhindura ikipe -Mino Raiola ushinzwe inyungu ze

Yanditswe na: SAFARI Garcon
Taliki:8/12/2020 9:46
0

Umujyanama wa Paul Pogba, ushinzwe inyungu ze ndetse no kumushakira amakipe, Mino Raiola, yatangaje ko uyu mukinnyi atishimye muri Manchester United kandi ko agomba kuva muri iyi kipe mu igura n'igurishwa ry'abakinnyi ritaha ryo mu kwezi kwa mbere.



Amasezerano y'uyu mukinnyi w'Umufaransa ukina mu kibuga hagati, azarangira mu kwezi kwa gatandatu mu 2022.

Pogba w'imyaka 27, amaze gukina imikino umunani gusa ya Premier League muri uyu mwaka w'imikino, abanza mu kibuga mu mikino itanu muri iyo, ndetse ku wa gatandatu ni bwo yatsinze igitego cye cya mbere muri uyu mwaka.

Raiola yagize ati: "Paul ntiyishimye. Ntabwo agishobora gutangaza ibyo atekereza nkuko yakabyifuje kandi nkuko biba byitezwe kuri we".

Yakomeje abwira ikinyamakuru Tuttosport cyo mu Butaliyani ati: "Agomba guhindura amakipe; agomba guhindura akajya ahari undi mwuka".

"Afite amasezerano azarangira mu mwaka umwe n'igice uri imbere, ariko ntekereza ko umuti mwiza cyane ku mpande zombi ari ukumugurisha ku isoko ritaha".

Mu mwaka wa 2016 ni bwo Pogba yasubiye muri United avuye muri Juventus aguzwe miliyoni 89 z'amapawundi. Ntabwo ahisha ko yifuza gukinira Real Madrid.

Mu kwezi kwa cumi na kumwe, umutoza w'ikipe y'igihugu y'Ubufaransa Didier Deschamps yavuze ko Pogba "adashobora kwishima" kubera ukuntu afashwe muri United.

Mu mwaka ushize w'imikino, Pogba yakiniye United imikino 22 gusa mu marushanwa yose kubera imvune ku kagombambari, ariko mu kwezi kwa munani Raiola yavuze ko hagiye kubaho ibiganiro kuri kontaro nshya.

Ariko, ku wa mbere Raiola yavuze ko igihe cya Pogba muri United ubu "kirangiye".

Yagize ati: "Ntacyo bimaze kubica ku ruhande. Icyiza kurushaho ni ukubivugaho neza, kureba imbere no kudapfusha igihe ubusa". Raiola yavuzeko bitari ku bushake bwa Pogba kongera amasezerano muri United.

Mino Raiola yatangaje ko mu kwa mbere Pogba agomba kuva muri Manchester United

Pogba ntiyishimiye uburyo afashwe muri Manchester United





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND