Kigali

Uganda: Ku nshuro ya mbere mu mateka umuhanzi wo muri iki gihugu agiye guhatana mu bihembo bikomeye ku Isi bya Grammy Awards

Yanditswe na: Neza valens Vava
Taliki:25/11/2020 16:22
0

Uganda ikomeje kugaragaza ko ari igihugu kimaze gutera imbere mu muziki. Ku nshuro ya mbere, umuhanzi ukomoka muri iki gihugu azahatana mu bihembo bikomeye mu muziki ku isi bya Grammy Awards.



Micheal Kiwanuka ubaye umuhanzi wa mbere wo muri Uganda uhatanye mu bihembo bikomeye mu muziki ku isi bya Grammy Awards, yagaragaje amarangamutima ye nk'ugeze kuri aka gahigo bwa mbere avuga ko abyishimiye cyane anyuze ku mbuga nkoranyambaga ze. Yagize ati: ”Ndanyuze kandi nsazwe n’ibyishimo byo kuvuga ko album yanjye ‘’KIWANUKA’’ ihatanye mu bihembo bya Grammy".


Ubuhanga bwe mu muziki bwatumye yigarurira imitima ya benshi ku isi

Iyi Album ye ‘’KIWANUKA’’ ihatanye mu cyiciro cya album nziza ya Rock y’umwaka. Muri iki cyiciro arimo azaba ahanganye n’ibindi byamamare nka, Grace Potter, Fontaines D.C, Sturgill Simpson, The Strokes. Ubusanzwe amazina ye nyakuri yitwa Michael Samuel Kiwanuka, yabonye izuba tariki 3 Gicurasi 1987. Ni umwanditsi mwiza, umuririmbyi akaba n’utunganya indirimbo mu buryo bw’amajwi. Magingo aya akorana n’inzu ifasha abahanzi yitwa Polydor Records yavuye kuri Universal Music Group.

Muri Uganda nta zina rinini ahafite mu muziki kuko atahabaye. Ababyeyi be bombi ni abagande, gusa yavukiye Muswell Hill mu Bwongereza aba ari naho akurira. Amashuri yisumbuye yayize ahitwa Fortismere, nyuma yaho yaje kwiga ibijyanye n’ubugeni muri kaminuza yitwa Westminster iri mu Bwongereza.

Album ye ya mbere yise ‘Home Again’ yayishyize hanze mu 2012, yarakunzwe cyane mu Bwongereza. Iya kabiri yise ‘Love & Hate’ nayo yarakunzwe ndetse iza no kugera ku mwanya wa mbere mu 2016. Yagiye ahatana mu bindi bihembo bitandukanye nka Brit Awards, MTV Europe Music Awards na BBC Music Awards. Ibihembo yatwaye bizwi mu muziki birimo BBC sound of 2012 yatwaye muri Mutarama 2012 n’ikindi kitwa Hyundai Mercury Prize yegukanye muri Nzeri 2020.

Ibi bihembo ahatanyemo bya Grammy Award bigeyi kuba ku nshuro ya 63, bizatangwa ku cyumweru tariki 31 Mutarama 2021. Ni we mugande wa mbere uhatanye muri ibi bihembo bikomeye mu muziki ku isi.


Aherutse kwegukana igihembo cya Hyundai Mercury


REBA HANO INDIRIMBO YE HOME AGAIN







TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND