Uduhigo n'amateka umukino w'Amavubi na Cape Verde ushobora gusiga

Uyu mukino usanze u Rwanda ku mwanya wa nyuma n'inota rimwe gusa rutsinze uyu mukino wa Cape Verde rwahita ruva kuri uyu mwanya.

Ikipe y'igihugu Amavubi niramuka itinjije igitego kuri uyu mukino ikinamo na Cape Verde, iraba imaze imikino 4 yose yo mu matsinda itarebye mu izamu,  imikino ingana n'iminota 360 Amavubi adahindukije umuzamu.

Bwa mbere mu mateka, Amavubi agiye kwakira umukino nta bafana bahari, tugendeye ku mpamvu zose zishobora gutuma ikipe ikina nta bafana bari ku kibuga.

Sugira Ernest naramuka abanje mu kibuga u Rwanda ruraba rufite rutahizamu uheruka kunyeganyeza inshundura mu bitego Amavubi aheruka gutsinda. Sugira Ernest natsinda igitego kuri uyu mugoroba, araba atsinze ibitego 3 mu mikino 4 iheruka akiniye iyi kipe itozwa na Mashami Vincent.

Sugira Ernest yitezwe kugaruka mu kibuga

Rubanguka Steve naramuka adakinnye umukino wo kwishyura wa Cape Verde, biraba bibaye inshuro ya kabiri uyu mukinnyi ukina mu kibuga hagati, ahamagawe mu Mavubi ariko ntiyandikishe iminota ye mu kibuga yambaye imyenda y'urwa Gasabo.

Amavubi nadatsinda umukino bari buhuremo na Cape Verde araba arangije umwaka wa 2020 nta ntsinzi abonye.

Kuva Mashami Vincent yaba umutoza mukuru w'Amavubi muri Kanama 2018, Amavubi amaze kwakira imikino 8 atsindamo umukino umwe, anganya imikino 5 atsindwa 2 gusa mu mikino yo gushaka itike y'igikombe cya Afurika, Mashami Vincent ntarabona intsinzi n'imwe ku butaka bw'u Rwanda ye we no hanze.