RFL
Kigali

Mario Balotelli wakiniye Manchester City agiye gusinyira ikipe yo mu Misiri

Yanditswe na: SAFARI Garcon
Taliki:12/11/2020 15:31
0


Ikipe ya Pyramids yo mu gihugu cya Misiri, imaze iminsi mu biganiro na rutahizamu ukomoka muri Ghana ariko ufite ubwenegihugu bw'u Butaliyani, Mario Balotelli, wamaze gutandukana n'ikipe ya Brescia mu Butaliyani yakiniraga.



Balotelli w'imyaka 30 y'amavuko, wakiniye amakipe akomeye i Burayi arimo Inter Milan, Man City, AC Milan, na Liverpool ndetse na Brescia, ashobora kwisanga ku mugabane wa Afurika, iteka ahora atangaza ko kuba umunyafurika bimutera ishema ndetse akanabigaragaza mu bikotrwa bye bya buri munsi.

Balotelli yakoze amateka akomeye mu makipe yanyuzemo, aho yegukanye ibikombe birimo UEFA Champions League, Premier League ndetse na Serie A, ahamagarwa mu ikipe y'igihugu y'u Butaliyani inshuro 30, atsinda ibitego 14.

Ubuyobozi bw'ikipe ya Pyramids bukimara kubona ko amakuru yuko uyu mukinnyi ufite amateka akomeye muri ruhago ku Isi ageze kure mu biganiro n'iyi kipe, bwihutiye kunyomoza ayo makuru, bwise ibihuha.

Gusa amakuru ava mu nswhuti za hafi za Mario Balotelli, ni uko abaherwe b'ikipe ya Pyramids biteguye guha uyu mukinnyi buri kimwe cyose yifuza akaza gukina muri shampiyona ya Misiri.

Balotelli kuri ubu uri kwitoreza mu ikipe ya Franciacorta yo mu cyiciro cya kane mu Butaliyani, hari andi makuru amwerekeza muri shampiyona y'u Bwongereza mu makipe ya Watford na West Ham United nazo bivugwa ko zimwifuza.

Mu gihe Balotelli yakinira ikipe ya Pyramids, yaba abaye umukinnyi ukomeye ku Isi wa mbere mu myaka ine ishize ukinnye muri shampiyona ya Misiri, nyuma yuko Florent Malouda wakiniraga ikipe y'igihugu y'u Bufaransa akiniye ikipe ya Wadi Degla mu 2016.

Ikipe ya Pyramids yabuze amahirwe yo kwegukana igikombe mu mwaka ushize w'imikino igasoza ku mwanya wa gatatu n'amanota 65, byatumye yongera kubona itike yo gukina imikino ya CAF Confederation Cup.

Iyi kipe ikomeje kwiyubaka, aho iheruka gusinyisha umutoza ukomoka muri Argentina,  Rodolfo Arruabarrena ndetse na rutahizamu w'umunya-Palestina, Mahmoud Wadi, wasoje umwaka ushize ariwe watsinze ibitego byinshi mu ikipe ya AL Masyr yakiniraga.

Pyramids izatangira imikino ya CAF Confederations Cup mu mikino y'ijonjora rya kabiri, aho izahura n'izarokoka hagati ya  Al-Ittihad yo muri Libya na Horseed SC yo muri Somalia.

Balotelli ukinira ikipe y'u Butaliyani ashobora kwisana muri shampiyona ya Misiri

Ikipe ya Pyramids ikomeje kwitegura imikino ya CAF Confederations Cup





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND