Umunya-Cameroun wakiniye amakipe akomeye i Burayi arimo Arsenal yo mu Bwongereza na FC Barcelona yo muri Espagne, anakinira ikipe y'igihugu ya Cameroun, Alex Song, yamaze gusinya amasezerano y'imyaka ibiri muri AS Arta Solar7 yo mucyiciro cya mbere muri Djibouti avuye muri FC Sion yo mu Busuwisi.
Biragoye kwiyumvisha ko Alex Song wari uhetse Arsenal mu myaka 10 ishize, akaba umukinnyi ngenderwaho muri FC Barcelona mu myaka 7 ishize, klu myaka 33 y'amavuko yakwerekeza muri shampiyona itazwi no ku mugabane wa Afurika.
Song nta kipe yari afite magingo aya, nyuma yuko FC Sion yakiniraga ihagaritse ikanashyira akadomo ku masezerano ye kubera icyorezo cya Coronavirus.
Song wahamagawe inshuro 49 mu ikipe y'igihugu ya Cameroun, yari amaze amezi 8 nta kipe afite, none birangiye afashe icyemezo gikomeye cyo gukinira ikipe itazwi, ndetse no mu gihugu kitazwi mu mupira w'amaguru muri Afurika.
Amakuru atangazwa n'ibinyamakuru byo muri Cameroun avuga ko uyu mukinnyi yasinye amasezerano y'imyaka ibiri mu ikipe ya AS Arta Solar7 yo mu cyiciro cya mbere muri Djibouti.
Mu mwaka ushize w'imikino ikipe ya Arta Song yasinyiye yasoje ku mwanya wa kane muri shampiyona ya Djibouti n'amanota 24, ikaba yararushijwe amanota 4 na Total FC yegukanye igikombe.
Mu 2012 nibwo Song yavuye muri Arsenal yerekeza muri Barcelona atanzweho Miliyoni 15 Z'ama-Pound, nyuma yo gukinira Arsenal imikino 215.
Alex Song yakiniye amakipe atandukanye y'i Burayi, arimo Bastia yo mu Bufaransa, Arsenal na Westham zo mu Bwongereza, FC Barcelona yo muri Espagne, FC Rubin Kazan yo mu Burusiya na FC Sion yo mu Busuwisi.
Alex Song yamaze kwerekeza muri shampiyona ya Djibouti
Song yabaye umukinnyi ukomeye muri Arsenal
Eng
RSS 
TANGA IGITECYEREZO