Sergio Ramos yaciye agahigo ko kuba myugariro wa mbere muri Real Madrid utsinze ibitego 100

Igitego cy'umutwe Ramos yatsinze ku mukino wa Inter Milan muri UEFA Champions League mu ijoro ryo ku wa 03 Ugushyingo 2020, cyujuje umubare w'ibitego 100 amaze gutsindira Real Madrid  mu myaka 15 ayimazemo, aca agahigo ko kuba myugariro wa mbere ubikoze mu mateka y'iyi kipe.

Ramos yinjiye ku rutonde rw'abakinnyi 19, batsinze ibitego 100 bambaye umwambaro wa Real Madrid.

Mu bakinnyi 19 batsindiye Madrid 100 muri iki kinyejana, 15 bakina basatira, 2  bakina mu kibuga hagati na Fernando Hierro na myugariro Sergio Ramos.

Mu myaka 15 amaze i Santiago Bernabeu, Ramos yabaye myugariro wa mbere wakiniye iyi kipe uyitsindiye ibitego 100. Igitego cya mbere muri Real Madrid, Ramos yagitsinze tariki ya 06 Ukuboza 2005 ku mukino wa Olympiacos muri UEFA Champios League, akaba yaragitsindishije umutwe, ku mupira w'umuterekano (Coup Franc) yari itewe na Raul Bravo.

Icyo gihe agaciro ke klari kuri Miliyoni 30 z'ama-Euro, ariko kuri ubu agaciro k'uyu myugariro kari hejuru cyane.

Ramos yatsindiye Real Madrid muri buri mwaka w'imikino ndetse ni umwe mu bakinnyi bafashije cyane iyi kipe kwegukana ibikombe bitandukanye birimo n'ibya Champions League.

Ramos yagizwe umukinnyi uhoraho utera penaliti zibonetse ku ruhande rwa Real Madrid, bituma akomeza kuba umukinnyi utsinda ku buryo buhoraho. Muri uyu mwaka w'imikino, Rasmos amaze gutsindira Madrid ibitego bitatu.

Sergio Ramos yujuje ibitego 100 amaze gutsindira Real Madrid mu myaka 15 ayimazemo

Ramos yatsinze igitego cya 100 ku mukino Real Madrid yatsinze Inter Milan 3-2