Rutahizamu wa Juventus de Turin, Cristiano Ronaldo wari umaze iminsi 20 adakandagira mu kibuga kubera Coronavirus, yagarukanye intsinzi y'ibitego bibiri mu mukino ikipe ye yatsindiye Spezia mu rugo 4-1.
Wari umukino wa mbere Cristiano akinnye nyuma yo kuva mu kato yari amazemo igihe kitari gito nyuma yo gusangwamo Coronavirus ubwo yari mu mwiherero w'ikipe y'igihugu ya Portugal yiteguraga imikino ya UEFA Nations League.
Mu mukino Juventus yatsinzemo Spezia 4-1 kuri iki cyumweru tariki ya 01 Ugushyingo 2020, Cristiano yatsinzemo ibitego 2, yereka abafana ba Juventus ko ameze neza kandi yagarukanye imbaraga nyinshi nyuma yo kumara igihe adakina.
Ku munota wa 59' nibwo Cristiano yatsinze igitego cya mbere cyari icya kabiri ku ruhande rwa Juventus ku mupira yahawe na Alvaro Morata, ku munota wa 76' kuri penaliti, Cristiano yatsinze igitego cya kabiri cyabaye icya kane ku ruhande rwa Juventus.
Tariki ya 13 Ukwakira 2020, nibwo Ronaldo yasanganwe Covid-19 nyuma y’iminsi mike akinnye umukino wahuje Portugal na Espagne.
Kwandura kwa Ronaldo kwatumye asiba imikino myishi Juventus yakinnye mu marushanwa atandukanye ndetse n'imikino y'ikipe y'igihugu ya Portugal.
Ronaldo ntiyakinnye imikino 4 Juventus iheruka gukina Coronavirus yanduriye mu ikipe y’igihugu ya Portugal, harimo n'uwo Juventus iheruka gutsindwa na FC Barcelona muri UEFA Champions League.
Ibitego bibiri Cristiano yatsinze byatumye yuzuza ibitego 5 amaze gutsinda muri shampiyona y'u Butaliyani muri uyu mwaka w'imikino, mu mikino itatu amaze gukina.
Cristiano yatsinze ibitego bibiri ku mukino wa mbere yakinnye nyuma yo gukira Coronavirus
Ronaldo yatsinze penaliti yavuyemo igitego cya 4 cya Juventus
Eng
RSS 
TANGA IGITECYEREZO