Umunyamideli w’umunyafaranga w’umunyamerikakazi Khloe Kardashian, yahishuye ibihe bikomeye yari amazemo iminsi nyuma y’uko ibizamini by’abaganga bigaragaje ko yanduye icyorezo cya Covid-19 kibasiye Isi muri iki gihe.
Yabitangaje mu kiganiro ‘Keeping Up with The Kardashians’ cyo kuri uyu wa Gatatu tariki 28 Ukwakira 2020, yahuriyemo n’abavandimwe be Kim Kardashian n’abandi basanzwe bafatanya gukora iki kiganiro gikundwa n’umubare munini.
Khloe Kardashian yiyongereye kuri miliyoni z’abanyamerika bamaze kwandura iki cyorezo cya Covid-19. Kim Kardashian avuga ko murumuna we yahuye n’ibihe bitoroshye, ariko bamubaye hafi mu buryo bwose.
Kris Jenner yavuze ko bitabaga telefoni ye, ndetse ko bagiye bakora uko bashoboye bahamagara abaganga batandukanye kugira ngo bite ku muvandimwe wabo ubu wamaze gukira agasubira mu buzima busanzwe.
Kardashian w’imyaka 36 yavuze ko mu gihe yari amaze yanduye Covid-19 yahuye n’ibihe bikomeye, birimo n’ibimenyetso byamugejeje ku buribwe, ariko ko afite icyizere cy’uko azasubira mu buzima busanzwe.
Ati “Byari ibintu bibi mu minsi micye ishize, kuruka, gutengurwa, umuriro n’imbeho. Ukongeraho n’ububare bw’umutwe budasanzwe. Inkorora n’ubu umuhogo wanjye nturameza neza gusa hari icyizere ko ibi nza kubirenga.”
Uyu mugore avuga ko yishyize mu kato yiha icyumba cye, ntiyagira aho ahurira n’umugabo we ndetse n’umwana we.
Episode ya nyuma y’ikiganiro ‘Keep Up with Kardashians’ izasohoka mu 2021, ni nyuma y’imyaka 14 iki kiganiro gikorwa na Kim Kardashian n’abavandimwe be.
Muri Leta Zunze Ubumwe za Amerika abantu barenga miliyoni 8 banduye Coronavirus n’aho ibihumbi 228 yarabishe. Ni mu gihe ku Isi yose, abarenga miliyoni 44 banduye Covid-19, miliyoni zirenga 29 barayikize n’aho abarenga miliyoni imwe imaze kubica.
Khloé Alexandra Kardashian ni umunyamakuru w’umunyamerika akaba n’umwe mu bantu bazwi ku mbuga nkoranyambaga. Kuva 2007 yafatanyije n’abo mu muryango we mu kiganiro cy’uruhererekane gica kuri Televiziyo kizwi nka ‘Keeping Up with the Kardashians’.
Uyu mugore yabonye izuba ku wa 27 Nyakanga 1984, avukira mu Mujyi wa Los Angeles muri California ho muri Leta Zunze Ubumwe za Amerika. Kuva mu 2009 kugeza mu 2016 yabanaga n’umugabo witwa Lamar Odom baje gutandukana, ubu afite umwana umwe witwa True Thompson.
Khloe Kardashian yahishuye ibihe bikomeye yanyuzemo nyuma yo kwandura icyorezo cya Covid-19
Kardashian yifashishije 'selfie' ya camera agaragara mu kiganiro 'Keeping up with Kardashians' ahishura ko yanduye Covid-19
Eng
RSS 
TANGA IGITECYEREZO