Tanzania: Perezida Magufuli yasabye abaturage kwifatanya na Kenya mu masengesho y’iminsi 3 yo kwirukana Covid-19

Bwana Magufuli uyobora Tanzania ndetse uri no kwiyamamariza kongera kuyobora iki gihugu, ni umwe mu bakuru b'ibihugu bagiye bagaraga mu bikorwa bisa n'ibyizera ko amasengsho akiza covid-19 n'ubwo benshi bagiye bamutera utwatsi, gusa igihe kibaye kinini asubukuye imyidagaduro ndetse n’amasomo na cyane ko ubu ahamya ko nta Covid-19 ikirangwa muri iki gihugu.

Kenya igihe gukora amasengesho yo ku rwego rw'igihugu kuva uyu munsi wo kuwa 9 Ukwakira kugeza kuwa ku cyumweru tariki 11 Ukwakira 2020 nk'uko ikinyamakuru kenyannews.co.ke ibitangaza. Biteganyijwe ko aya masengesho ku rwego rw’igihugu azatangizwa tariki 10 Ukwakira 2020 n’umukuru w’iki gihugu cya Kenya, Uhuru Kenyatta.

Bwana John Pombe Magufuli Perezida wa Tanzania yatangaje ko abaturage be bagomba kwifatanya n'abanya-Kenya bakabatera ingabo mu bitugu mu kwirukana iki cyago nabo kikabajya kure hifashishijwe amasengesho.

Nyuma y'ubu busabe bwana Magufuli yunzemo agira ati: "Birakwiye ko tubafasha gusenga kugira ngo coronavirus ive iwabo nk'uko Imana yayivanye hano muri Tanzania". Muri iyi minsi icyorezo cya Covid-19 cyateye Isi, ibi bihugu (Kenya na Tanzania) byarebanye ay'ingwe biturutse ku kutemerera no kwangira abaturage kwambuka imbibi z'ibihugu byombi kubera urwicyekwe rwo kuyikwirakwiza.

Mu ntangiriro z'iki cyumweru Perezida Uhuru Kenyattta wa Kenya yatangaje ko agiye gusaba abaturage bose gusenga cyane kugira ngo iki cyorezo gishire mu iki gihugu. Muri ayo masengesho ibindi bibazo bikomereye igihugu yavuze ko nabyo bazabizirikana.

Amasengesho yo ku cyumweru yo biteganyijwe ko azabera ku biro by'umukuru w'igihugu i Nairobi guhera saa kumi za mu gitondo. Ayo masengesho kandi azerekanwa mu gihugu hose kuri radiyo na televiziyo no ku mbuga nkoranyambaga ari kuba.

Kuva mu kwezi kwa Gatanu, Tanzania yahagaritse gutangaza uko ihagaze imbere y'iki cyorezo, nyuma abategetsi bagiye bemeza ko iyi ndwara yashize muri iki gihugu. Magingo aya, mu gihe cya Kenya abantu banduye Covid-19 ni 40,178 ikaba imaze guhitana abagera kuri 751.

Src: bbc, kenyannews.co.ke