Zavier Gozo yerekeje muri Crystal Palace kuri Miliyoni $15

Crystal Palace yishyuye miliyoni 15 z’amadolari ya Amerika ($15m), ahwanye na miliyoni 13 z’amayero (€13m) kugira ngo ibone uyu mukinnyi w’imyaka 19.

Aya mafaranga yabaye igiciro kinini Real Salt Lake ibonye mu kugurisha umukinnyi mu mateka yayo, asumba miliyoni 10 z’amayero (€10m) iyi kipe yari yarabonye mu 2024 ubwo yagurishaga Andrés Gómez muri Stade Rennes yo mu Bufaransa.

Gozo w’imyaka 19 yasinyiye Crystal Palace amasezerano azamugeza mu mpera za shampiyona ya 2030/31.

Mu magambo ye nyuma yo kwerekeza muri iyi kipe yo mu Bwongereza, Gozo yavuze ko yishimiye cyane kuba agiye gukina muri Premier League, avuga ko ari inzozi za buri mukinnyi w’umupira w’amaguru.

Ati: “Ntegereje cyane gukina muri Premier League ndi kumwe na Crystal Palace. Ni inzozi za buri mukinnyi w’umupira w’amaguru. Nishimiye abantu ndetse n’umushinga bafite hano.”

Gozo wari umaze kwigaragaza muri MLS

Zavier Gozo ni umusaruro w’ishuri ryigisha umupira w’amaguru rya Real Salt Lake. Yatangiye gukinira ikipe nkuru muri 2024, ariko uyu mwaka wa 2026 ni wo wabaye uw’ingenzi cyane mu izamuka rye.

Mu mwaka ushize, Gozo yakinnye imikino 25 ya MLS atsinda ibitego bine anatanga imipira ivamo ibitego bitatu.

Muri uyu mwaka we wa 2026, uyu mukinnyi ukina ku ruhande rw’iburyo amaze kugira umusaruro ushimishije cyane, aho amaze gutsinda ibitego 6 no gutanga imipira 4 ivamo ibitego mu mikino 16.

Ni umukinnyi ushobora gukina ku myanya itandukanye ku ruhande rw’iburyo, ndetse akaba ashobora no gukina nka rutahizamu wo hagati.

Yari yatangiye kwitabwaho n’amakipe akomeye

Umusaruro wa Gozo watumye atangira gukurura amaso y’amakipe akomeye yo mu Burayi, cyane cyane ayo mu Bwongereza, Espagne n’u Budage.

Crystal Palace ni yo yaje gutsinda izindi kipe mu rugamba rwo kumwegukana, ihitamo gushora miliyoni 15 z’amadolari muri uyu musore ufatwa nk’umwe mu bakinnyi bakiri bato bafite impano ikomeye muri MLS.

Uko yitwaye neza ni na ko agaciro ke ku isoko ry’abakinnyi kazamutse cyane. Mu gihe gito, agaciro ke kavuye ku bihumbi 50 by’amayero kagera kuri miliyoni 6 z’amayero.

Ubu Gozo agiye gukomeza urugendo rwe muri Premier League, aho Crystal Palace imubonamo umukinnyi ukiri muto ushobora kuzagira uruhare runini mu mushinga wayo w’igihe kirekire.

Gozo kandi ari mu bakinnyi bakiri bato bafite agaciro gakomeye muri MLS, aho abakinnyi babiri gusa bo muri icyo cyiciro bamurusha agaciro ku isoko.