Yakozweho n’abarenga 20! Platini na Nel Ngabo bavuye imuzi Album yabo ifatiye kuri filime Black Panther

Mu kiganiro bagiranye n’itangazamakuru kuri uyu wa Gatanu tariki 11 Nyakanga 2025, aba bahanzi bavuze ko icyatumye bayita Vibranium ari uko bashakaga gutanga ubutumwa bujyanye n’agaciro k’umugabane w’Afurika, uko uriho ubu n’icyerekezo cyawo mu bihe biri imbere.

Platini yagize ati: “Twatekereje gukora Album itandukanye, dutangira tugamije gukora EP ariko mu gihe tugenda tuyinonosora, twabonye ko hari byinshi twakora. Twahise tuvuga tuti reka tuyite Vibranium, ijambo rizwi cyane muri filime ya Wakanda, risobanura ikintu gifite agaciro gakomeye, nk’uko natwe twifuza ko Afurika yacu itekerezwaho gutyo.”

Yavuze ko Vibranium ari Album yakozwe mu gihe cy’umwaka umwe, ndetse ko bakoze ‘affiche’ yayo bashingiye ku isura y’iyo filime, cyane cyane mu buryo igaragaza ubushobozi n’iterambere ry’Afurika.

Iyi Album irimo indirimbo umunani, yakozwe n’abahanzi, abatunganya indirimbo n’abandi barenga 20. Platini yavuze ko byabaye akarusho kubona abahanzi nka Butera Knowless, Mamba, Da Rest n’abandi bafatanyije muri iki gikorwa. Ati “Knowless studio iri iwe mu rugo, buri kanya aba ahari. Iyo agize igitekerezo aratugana tukagikoraho.”

Yakomeje avuga ko banahaye amahirwe abanyeshuri biga umuziki ku Ishuri rya Muzika rya Nyundo, ndetse bakanifashisha studio z’iryo shuri mu itunganywa ry’iyi Album.

Nel Ngabo yavuze ko gukora iyi Album byamuhaye amahirwe yo kwagura ubuhanzi bwe no kugerageza injyana zitandukanye atari asanzwe aririmbamo. Avuga ati “Byari iby’agaciro kuri njye nka Nel Ngabo, kuko nagerageje injyana nshya, binamfasha gukura mu buhanzi.”

Ishimwe Karake Clement, washinze Kina Music, yavuze ko iyi Album yagombaga kujya hanze ku itariki 11 Nyakanga 2025 ariko iza kwimurwa igashyirwa ku itariki 29 Nyakanga 2025.

Yagize ati: “Twagize amahirwe yo kubona abaterankunga bashaka kugira uruhare mu bikorwa bizakurikira Album harimo ibitaramo, gukora amashusho y’indirimbo, kwamamaza n’ibindi. Ibyo byose byatumye dushyira inyuma amatariki.”

Yavuze ko album yakozweho n’abantu bari hagati ya 20 na 30, ashimira aba producers barimo Mamba, Devydenko, Element n’abandi bagize uruhare rukomeye mu kuyitunganya. Ati “Devydenko yanyeretse ubuhanga budasanzwe, yarakoze ibintu biremereye. Nizeye ko iyo Album izagera kure.”

Clement yemeje ko amashusho y’indirimbo ebyiri yamaze gufatwa, kandi ko indirimbo ya mbere izajya hanze ku wa Gatanu w’icyumweru gitaha.

Clement yavuze ko barimo kuganira n’abantu batandukanye mu rwego rwo kwagura ubukangurambaga bwo kwamamaza Album haba mu gihugu imbere no hanze yacyo. Barimo gutegura ibitaramo bizahuza abafana n’abahanzi, kandi n’abahanzi bakinjiza amafaranga.

Ati “Twifuza gukora ibitaramo bituma abafana bagira amahirwe yo kubona abahanzi imbonankubone, ndetse n’abahanzi bakaboneraho kwinjiza amafaranga.”

Yasoje avuga ko binyuze mu bikorwa bijyanye n’iyi Album hatanzwe imirimo ku bantu barenga 20 mu bijyanye no kuyitunganya, ndetse n’abari hagati ya 30 na 50 mu bijyanye n’ifatwa ry’amashusho.

Asubiza ikibazo cy'umunyamakuru wa InyaRwanda, Platini yavuze ko afatanyije na Nel Ngabo batekereje gukorana Album ariko bayishingira ku kwishima, no kugaragaza isura nziza y'umugabane wa Afurika.

Ati “Twagize igitekerezo cya Album ariko byari byatangiye ari EP. Turavuga tuti tuzakora  'Vibes' itandukanye n'uko wavuga ibuye ry'agaciro, tubona ibuye ry'agaciro twayiha ari 'Vibranium' nk'uko mwaryumvise muri filime ya Wakanda. Hanyuma rero kuba iryo jambo rizwi kuri iyi filime aba ari ryo dufatiraho. Ikirenze kuri ibyo, ni filime y'abanyafurika, ariko igaragaza iby'imyaka iri imbere. Ni ukuvuga ngo uyu munsi, ariko turatekereza ahazaza."

Yavuze ko ibi byanatumye bakora 'Affiche' ishingiye ku ishusho y'ibigaragara muri filime 'Wakanda', ndetse n'uburyo nabo bakoze indirimbo ziri kuri iyi Album.

Ibyo wamenya kuri filime ‘Black Panther’ yubakiweho Album ya Platini na Nel Ngabo

Black Panther: Wakanda Forever ni filime y’icyamamare ya Marvel Cinematic Universe (MCU), yasohotse ku itariki 11 Ugushyingo 2022. Ni igice cya kabiri gikurikira Black Panther (2018), ndetse iba n’inkuru ikomeza ubuzima bwa Wakanda nyuma y’urupfu rwa King T’Challa, wari wakinwe na Chadwick Boseman, witabye Imana mu 2020.

Yayobowe (Director) na Ryan Coogler, imara amasaha 2 n’iminota 41. Ikomoka kuri Marvel Comics, ikaba ari imwe mu zubakiye ku busobanuro bwa “superhero” yitwa Black Panther.

Mu ntangiriro y’iyi filime, habaho gushyingura kwa King T’Challa, nyuma y’uko atabarutse azize indwara itavuzwe neza. Abasigaye bayobowe na Queen Ramonda (Angela Bassett), bagomba kurinda Wakanda ndetse n’ibanga ry’ibuye ry’agaciro (Vibranium) mu gihe ibindi bihugu byatangiye gushaka kurigeraho.

Abanya-Wakanda bagiye guhura n’umwanzi mushya witwa Namor, umwami w’igihugu cyo mu mazi kitwa Talokan (gifite ishusho ishingiye ku mico ya Mayans bo muri Amerika y’Amajyepfo). Namor aba yifuza ko Wakanda bamufasha kurwanya ibihugu by’Isi bikomeje gushakisha Vibranium.

Bitewe n’ibihe bikomeye Wakanda irimo, Shuri (mushiki wa T’Challa, wakinwe na Letitia Wright) aza kuba ari we ufata igihango cya Black Panther kugira ngo arwane ku gihugu cye n’umuco wacyo.

Filime yagaragaje cyane iterambere ry’ikoranabuhanga rya Wakanda, harimo ibikoresho by’ubwirinzi, ingabo ziteye imbere, ndetse n’uruhare rwa Vibranium nk’ikintu cy’ingenzi cyane mu kurengera no kubaka ubudahangarwa bwa Afurika muri iyo si ya Marvel.

Soundtrack y’indirimbo: irimo indirimbo “Lift Me Up” ya Rihanna, yanditswe nk’icyubahiro kuri Chadwick Boseman.

Film irimo umuco mwinshi wa Afurika ugaragazwa mu myambarire, imbyino, umuziki, imyemerere n’imitekerereze. Igaragaza isura y’Afurika itekanye, yateye imbere, ariko itekereza no ku mico gakondo.

Angela Bassett wakinnye muri iyi filime, yatsindiye Golden Globe Award nk’umukinnyi w’umugore mwiza wunganira abandi (Best Supporting Actress).

Filime yinjije amafaranga arenga 855 miliyoni z’amadolari ku isi hose. Yahawe ibindi bihembo n’amashimwe menshi kubera uburyo yagaragaje ibyiyumvo, umuco, no guha icyubahiro Chadwick Boseman.

Iyi filime yubakiye ku nkomoko y’Abanyafurika, igaragaza Afurika nk’ishusho y’ubukire, ubwenge n’imbaraga. Ni icyubahiro ku ndangagaciro za Black Panther, ariko inagaragaza iterambere, ubumwe n’icyizere cy’ahazaza. Yagize uruhare rukomeye mu guhindura uko sinema ya Hollywood yerekana Afurika. 

Platini na Nel Ngabo bagarutse ku isura nshya ya Afurika binyuze muri Album yabo Vibranium

Vibranium: Album ya Platini & Nel Ngabo yahuriyemo abahanzi barenga 20 n’abanyeshuri ba Nyundo 

Yiswe Vibranium kubera agaciro k’Afurika: Ibihe bidasanzwe byaranze itangizwa ry’iyi Album 

Filime yabaye Black Panther, Platini na Nel Ngabo baba abahanzi b’icyerekezo

Ishimwe Clement yavuze ko mu gukora iyi Album batanze akazi ku bantu bari hagati ya 30 na 50 mu ikorwa cyane cyane ry'amashusho (Video)

Nel Ngabo yavuze ko gukorana na Platini P byamusigiye amasomo akomeye, kandi bituma agerageza n'izindi njyana

Uhereye ibumoso: Producer Davydenko, Platini P, Ishimwe Karake Clement, Nel Ngabo ndetse na Producer Mamba

Producer Mamba yavuze ko yungutse ubumenyi bwihariye ubwo yakoreraga indirimbo Platini P na Nel Ngabo kuri iyi Album

Platini P yavuze ko Album yabo bayishingiye cyane ku buryo filime Black Panther ikozemo mu kugaragaza isura ya Afurika

 Nel Ngabo ari kumwe na Producer Mamba wagize uruhare mu ikorwa ry'indirimbo nyinshi kuri Album