Ibi yabigarutseho mu kiganiro yagiranye na
InyaRwanda, nyuma yo kugira uruhare mu kwizihiza isabukuru y’imyaka 80
y’amavuko ya Cécile Kayirebwa n’imyaka 60 amaze mu muziki, ibirori byabaye
umwanya wo guha icyubahiro uyu muhanzikazi wamaze imyaka myinshi akora ibikorwa
by’iterambere ry’inganzo Nyarwanda.
Mani Martin ni umwe mu bahanzi baririmbye muri ibyo birori, aho yari kumwe na Bolingo Paccy, Kenny Mirasano, Ange, Pamella n’abandi.
Ni ibirori byanitabiriwe n’abarimo Minisitiri w’Ububanyi n’Amahanga
n’Ubutwererane, Amb. Olivier Nduhungirehe, Umuyobozi w'Urwego Ngishwanama
rw'Inararibonye z'u Rwanda, Tito Rutaremara.
Kuri Mani Martin, kwizihiza Kayirebwa
ntibyari ibirori bisanzwe, ahubwo byari uburyo bwo guha agaciro umuntu wagize uruhare
rukomeye mu gukunda umuziki, kumva uburemere bw’inganzo no kugira inyota yo
kumenya amateka y’abahanzi.
Yagize ati: “Cécile Kayirebwa kumwizihiza kuri
njye ni ukwizihira inganzo itazima muri we, yanabaye imbarutso y’urukundo
nkunda ubuhanzi kugeza n’ubu.”
Mani Martin yavuze ko yatangiye gukunda
umuziki akiri umwana muto, ubwo yari atuye i Kagezi ka Mushoroza. Icyo gihe
yakundaga gutega amatwi abaririmbyi batandukanye, haba mu Kiliziya ndetse no
kuri Radiyo, ariko hari indirimbo imwe yamukoze ku mutima kurusha izindi.
Yasobanuye ko se yari atunze Radio
yakoreshaga ingufu zituruka ku mirasire y’izuba, kandi kugira ngo ikore byasabaga
kuyikuramo umuriro no kuyikaraga. Nubwo byasabaga imbaraga, ku myaka itandatu
yari amaze kumenya kuyikoresha kugira ngo abashe kumva indirimbo yakundaga.
Ati: “Njye rero ubwo ku myaka yanjye itandatu
nari naramenye gukaraga Radio ikavuga, nkayumvira indirimbo. Hari iyitwa
‘Inzozi’ yacaga kuri Radio buri munsi, ngahora nsaba Imana ngo rimwe
izanyigirire nk’akanyoni bita kasuku gafata mu mutwe cyane, mbashe gufata iyo
ndirimbo numvaga idasanzwe!”
Yavuze ko yagiye afata uduce tw’iyo
ndirimbo buhoro buhoro, kugeza ubwo yashoboye kuyiririmba yose. Yaje
kuyiririmbira abanyeshuri biganaga mu mashuri abanza, ndetse n’umwarimu mu
kizamini cy’isomo rya muzika, bose baratangara.
Mani Martin yavuze ko umwarimu we,
Barwanashyaka Emmanuel, yamuhaye amanota yose, anabwira ko yumva afite impano
ikomeye yo kuririmba.
Ibyo byamwongereye icyizere, bituma
arushaho gukunda umuziki no gushaka kumenya byinshi ku bahanzi yumvaga kuri
Radio. Muri abo, Cécile Kayirebwa yari umwihariko kuko ijwi rye yarimenyeraga,
akabasha kuritandukanya n’ay’abandi bahanzi.
Ati: “Kayirebwa we namwumva nkumva ijwi rye
nzi kuritandukanya n’ay’abandi bose.”
Uko Mani Martin yakuraga, ni ko yarushagaho
kugira amatsiko yo kumenya umuntu waririmbaga indirimbo zamukoraga ku mutima,
cyane cyane Kayirebwa. Yashakaga kumenya amazina y’abahanzi, amateka yabo n’aho
babaga, kuko yumvaga ko ibyo byamufasha kurushaho gusobanukirwa umuziki
yakundaga.
Yavuze ko icyo gihe u Rwanda rwari mu
rugendo rwo kongera kwiyubaka, bityo ko hari abahanzi benshi yamenyaga yumva
batakiriho, mu gihe abandi batari batuye i Kigali nk’uko yabitekerezaga.
Benshi mu bahanzi yakundaga kumva bari baragiye
gutura mu mahanga, harimo na Cécile Kayirebwa. Ibyo byatumye atangira kwibaza
niba hari isano riri hagati yo kuba umuhanzi mwiza no kuba mu mahanga, kuko
abahanzi benshi yumvaga kandi akabona ko bafite impano ikomeye babaga batuye
hanze y’u Rwanda.
Yemera ko icyo gihe yari akiri umwana
udafite ubumenyi buhagije bw’amateka kugira ngo asobanukirwe impamvu zatumaga
abantu benshi batuye mu mahanga.
Nubwo atari azi impamvu zose zatumaga
abahanzi bamwe baba kure y’u Rwanda, gukunda inganzo yabo byakomeje kumutera
inyota yo kuzamenya byinshi no kuzahura na bo.
Nyuma y’imyaka myinshi yumva ijwi rya
Cécile Kayirebwa kuri Radio, Mani Martin yaje kubona amahirwe yo guhura na we
imbonankubone mu 2013, ubwo uyu muhanzikazi yari yitabiriye igitaramo cya East
African Party.
Mani Martin na we yari ari mu bahanzi bari
butaramane na Kayirebwa. Avuga ko guhura n’umuntu yari amaze igihe kinini
yifuza kumenya byamukoze ku mutima, ku buryo byamurenze akagira ikiniga
cy’ibyishimo.
Kuri we, guhura na Kayirebwa
ntibyarangiriye ku kumubona ku rubyiniro gusa. Byamuhaye amahirwe yo kumumenya
nk’umuntu, kugirana na we ibiganiro no kwigira byinshi ku muziki n’amateka
y’inganzo Nyarwanda.
Mani Martin yavuze ko Kayirebwa yaje
kumwakira iwe, bakaganira ku bintu bitandukanye bijyanye n’ubuhanzi,
by’umwihariko uko umuhanzi ashobora gusobanurira abandi injyana n’inganzo bye.
Ibi biganiro byamubereye ishuri rikomeye,
kuko byamufashije gusobanukirwa ko ubuhanzi atari ukuririmba gusa, ahubwo ko
burimo amateka, umuco, uburyo bwo gutekereza no kugeza ku bandi ubutumwa
bwihariye.
Yanavuze ko Kayirebwa yamusangije amateka
y’igihangange mu nganzo Nyarwanda, Rugamba Cyprien, wari mu bantu bagize
uruhare rukomeye mu guteza imbere ubuhanzi bushingiye ku muco nyarwanda.
Kuri Mani Martin, kumva ayo mateka no
kuganira na Kayirebwa byamwongereye icyubahiro yari asanganywe kuri uyu
muhanzikazi, bituma arushaho kumukunda no guharanira ko na we yakora inganzo
ifite igisobanuro kirenze kwishimisha gusa.
Mani Martin yavuze ko urukundo yakunze
umuziki wa Kayirebwa, hamwe n’ibiganiro bagiye bagirana, byamufashije kurushaho
gusobanukirwa icyerekezo yifuzaga guha inganzo ye.
Yagaragaje ko Kayirebwa ari umwe mu bantu
bamubereye urugero mu gukunda ubuhanzi no guhanga indirimbo zifite ubutumwa, ku
buryo na we yagiye arushaho guharanira gukora umuziki ujyanye n’indangagaciro
yumva zikwiye kuranga inganzo ye.
Yavuze ko ibyo yigiye kuri Kayirebwa
byamufashije kurushaho kwiyemeza guhanga inganzo iganisha ku Mana, nk’uko
yabitojwe n’indirimbo ye yise ‘Inzozi’.
Ibi bigaragaza ko indirimbo umuntu yumva
akiri muto ishobora kugira uruhare rukomeye mu kumwereka inzira azanyuramo mu
buzima, cyane cyane iyo iherekejwe n’abantu bamuha urugero rwiza n’ubumenyi
bumufasha gukura mu mpano ye.
Ku bwa Mani Martin, kwizihiza imyaka 80 ya
Cécile Kayirebwa n’imyaka 60 amaze mu muziki byari umwanya wo kwishimira
urugendo rw’umuhanzi utagize uruhare mu kubaka inganzo Nyarwanda gusa, ahubwo
wanagize uruhare mu gukurura urukundo rw’ubuhanzi mu bandi, barimo na we.
Kuba yararirimbye muri ibi birori, nyuma
y’imyaka myinshi Kayirebwa amubereye isoko y’ihumure n’inyigisho, ni igice
cy’urugendo rugaragaza uko inganzo ishobora guhuza ibisekuruza, igakomeza kubaho
no guha abandi imbaraga zo guhanga ibihangano byabo.
Mani Martin yavuze ko Cécile Kayirebwa yabaye imbarutso y’urukundo afitiye ubuhanzi kuva akiri umwana, ndetse ko guhura na we mu 2013 byamubereye ibyishimo bidasanzwe
Cécile Kayirebwa yizihije imyaka 80
y’amavuko n’imyaka 60 amaze mu muziki, mu birori byagarutse ku ruhare yagize mu
guteza imbere inganzo Nyarwanda