Uwahoze ari Nyampinga w’u Busuwisi yashinje Trump kumufata ku ngufu

Raporo yasohotse ku wa 26 Ukwakira 2026, isobanura ibyo Keul yavuze ku byabaye mu Ugushyingo 1993, ubwo yari yitabiriye irushanwa ry’ubwiza rya American Dream Pageant ryateguwe na Trump.

Iyo raporo inagaragaza ibibazo by’imibanire ya Trump na Jeffrey Epstein, umugabo wagize uruhare mu bikorwa byo gucuruza abantu hagamijwe kubashora mu bikorwa by’imibonano mpuzabitsina.

Uko Keul avuga ko yahohotewe

Nk’uko bigaragara muri raporo, Keul yari afite imyaka 24, akora mu bijyanye no kumurika imideli n’imari, ubwo Jill Harth yamufashaga kubona ubutumire bwo kwitabira irushanwa ryabereye muri Atlantic City na New York.

Mu gihe cy’ibirori byari byabereye muri hoteli Plaza, Trump ngo yaramwegereye, amubwira ko ashobora kumufasha kubona viza yo kuba muri Amerika no kwemererwa kwiga muri Kaminuza ya New York (NYU).

Raporo ivuga ko Epstein na we yaje kuganiriza Keul nyuma yaho, akamusezeranya kumufasha kubona amahirwe ajyanye n’amasomo n’akazi, ndetse akamutumira mu birori byari kubera muri Mar-a-Lago.

Nyuma y’ibyo, umuntu wari uhagarariye Trump ngo yatumiye Keul kujya kumusanga mu cyumba cyo hejuru muri iyo hoteli. Keul yavuze ko yatekerezaga ko agiye kuganira ku mahirwe yari yasezeranyijwe ajyanye n’akazi n’amasomo.

Icyakora, nk’uko yabisobanuriye abakozi ba Komisiyo y’Ubucamanza, Trump ngo yamufashe amuturutse inyuma, aramufata ku ngufu. Yavuze ko imyambaro yari yambaye yatabutse, agakomereka ndetse akava amaraso.

Keul yasobanuye ko ibyo avuga ko yakorewe byari bikomeye cyane, abisobanura nk’igikorwa cy’ubugome.

Raporo ivuga ko nyuma y’ibyo, Trump yongeye kumubwira ko azamufasha kubona viza no kwiga muri NYU, ariko amusaba kutagira uwo abibwira, ati: “Ibyabaye bigomba gukomeza nk’uko byari biteganyijwe.”

Keul ngo yakomeje kwitabira irushanwa afite ubwoba bwinshi, ariko nyuma asubira mu Busuwisi. Nyuma y’ibyumweru bike, yanze kwitabira irindi rushanwa ryari riteganyijwe kubera muri Hawaii kandi ryari rifitanye isano na Trump.

Raporo ivuga ko nyuma y’amezi make, Trump yongeye kumuhamagara ari mu Busuwisi, amusubiriramo ko ashobora kumufasha kubona viza no kwiga muri NYU. Keul ngo yanze ubwo bufasha.

Raporo ivuga ku marushanwa y’ubwiza

Raporo y’abadepite b’Aba-Democrate igaragaza ko irushanwa rya Donald J. Trump American Dream Pageant, ryari rigenewe abakobwa n’abagore bari hagati y’imyaka 16 na 22, rishobora kuba ryarakoreshejwe mu gushaka abakobwa bashoboraga guhura n’ihohoterwa.

Abayiteguye bavuga ko hari amakuru agaragaza uburyo Trump, Epstein n’abandi bashoboraga gukoresha ayo marushanwa kugira ngo begere abakobwa n’abagore bakiri bato, babizeza kubafasha mu buzima bwabo bw’akazi n’ubw’amasomo.

Raporo yanagarutse ku birego byatanzwe na Jill Harth mu rubanza rw’ihohoterwa rishingiye ku gitsina yarezemo Trump mu 1997, ndetse igereranya ibyo Keul avuga n’ibyo abandi bagore babwiye abakozi ba Komisiyo ku buryo Epstein yabizezaga amahirwe kugira ngo abegere kandi abagenzure.

Abadepite b’Aba-Democrate basabye ko hakorwa iperereza ryigenga kugira ngo ibirego bigaragara muri raporo bisuzumwe.

White House yahakanye ibirego

Umuvugizi wa White House, Lauren Bis, yahakanye ibirego Keul ashinja Trump, avuga ko raporo y’abadepite b’Aba-Democrate igamije inyungu za politiki. Mu butumwa yageneye ikinyamakuru PEOPLE, yagize ati: “Nta na kimwe muri ibi birego ari ukuri.”

Yakomeje avuga ko iyo raporo ari uburyo Aba-Democrate bakoresha mu kurangaza Abanyamerika no gutesha agaciro ibyagezweho na Trump. Yongeyeho ko Trump yigeze kwirukana Epstein muri Mar-a-Lago kubera imyitwarire ye, kandi ko ngo yahanaguweho ibirego byose bifitanye isano na Epstein.

White House ishimangira ko ibirego Keul yatanze atari ukuri, mu gihe raporo y’abadepite b’Aba-Democrate yo isaba ko hakorwa iperereza rirambuye. Kugeza ubu, Trump ntiyigeze aregwa mu rukiko icyaha gishingiye ku byo Keul amushinja.

Si ubwa mbere Trump avuzwe mu birego by’ihohoterwa rishingiye ku gitsina

Iyi nkuru yongeye kwibutsa ibirego by’ihohoterwa rishingiye ku gitsina byagiye bishinjwa Trump mu bihe bitandukanye, birimo ibyatanzwe n’umwanditsi E. Jean Carroll.

Carroll yavuze ko Trump yamufashe ku ngufu mu myaka ya za 1990, ubwo bari mu iduka ricuruza imyambaro rya Bergdorf Goodman i New York. Yavuze ko Trump yamufashe akamutsindagira ku rukuta rwo mu cyumba cyo kugeragerezamo imyambaro, akamubuza kwigobotora.

Trump yahakanye ibyo ashinjwa, avuga ko atari umuntu yashoboraga gukundana na we kandi ko atigeze amumenya, nubwo hari amafoto yabo bari kumwe.

Carroll yareze Trump mu 2019 amushinja kumusebya, nyuma aza gutanga urundi rubanza mu 2022 rumurega ihohoterwa no kumusebya.

Muri Gicurasi 2023, inteko y’abacamanza mu rubanza rw’imbonezamubano yasanze Trump ahamwa n’inshingano z’amategeko ku ihohoterwa rishingiye ku gitsina yakoreye Carroll no kumusebya.

Icyo cyemezo nticyari gihamya y’uko yamufashe ku ngufu, ahubwo cyari icyemezo cy’uko yamukoreye ihohoterwa rishingiye ku gitsina mu buryo bwemejwe n’urukiko.

Urukiko rwategetse Trump kwishyura Carroll miliyoni 5.6 z’amadolari. Yarakomeje kujuririra icyo cyemezo, ariko muri Kanama 2026 Urukiko rw’Ikirenga rwa Amerika rwanga kongera gusuzuma urwo rubanza.

Trump kandi yakomeje kujuririra ikindi cyemezo cy’urukiko cyamutegekaga kwishyura Carroll miliyoni 83 z’amadolari kubera kumusebya.

Nubwo raporo nshya y’abadepite b’Aba-Democrate igaragaza ibyo Keul ashinja Trump, ibyo birego ntibirahamywa n’urukiko. White House irabihakana, mu gihe abayiteguye basaba ko hakorwa iperereza ryigenga kugira ngo ukuri ku bivugwa kumenyekane.

Uwahoze ari Nyampinga w’u Busuwisi yashinje Trump kumufata ku ngufu