Inkuru y'urupfu rwe yatangajwe kuri iki Cyumweru, tariki ya 12 Nyakanga 2026, n'Ibiro by'Umuyobozi w'Ikirenga wa Qatar (Amiri Diwan), byihanganisha Abanya-Qatar n'umuryango we.
Mu butumwa bwabyo, byagize biti: "Amiri Diwan iramenyesha urupfu rwa Nyakubahwa Umubyeyi w'Igihugu, Sheikh Hamad bin Khalifa Al Thani. Imana imwakire mu bayo kandi imuhembe ibyiza ku byo yakoreye igihugu cye n'Igihugu muri rusange."
Sheikh Hamad yayoboye Qatar kuva mu 1995 kugeza mu 2013, nyuma yo gufata ubutegetsi mu ihirikwa ritamennye amaraso ryakuyeho se. Mu 2013, yeguriye ubutegetsi umuhungu we, Sheikh Tamim bin Hamad Al Thani, ukomeje kuyobora Qatar kugeza ubu.
Mu gihe cy'ubutegetsi bwe, Qatar yagize iterambere rikomeye mu bukungu no mu rwego rwa dipolomasi, ihinduka kimwe mu bihugu bifite ijambo rikomeye mu Burasirazuba bwo Hagati. Yagize uruhare rukomeye mu guteza imbere Al Jazeera, imwe mu miyoboro y'itangazamakuru izwi cyane ku Isi.
Yanabaye umwe mu bagize uruhare rukomeye mu gutuma Qatar ihabwa kwakira Igikombe cy'Isi cya FIFA 2022, cyabaye ubwa mbere iryo rushanwa ribereye mu gihugu cyo mu Burasirazuba bwo Hagati.
Nubwo Qatar ari igihugu gito gituwe n'abaturage barenga miliyoni 2.5, yabaye kimwe mu bihugu bikomeye ku Isi mu kohereza gaze karemano itunganyijwe (Liquefied Natural Gas - LNG), ndetse iba n'umushoramari ukomeye ku rwego mpuzamahanga.
Urupfu rwa Sheikh Hamad rusize amateka akomeye y'umuyobozi wahinduye isura ya Qatar, akayigira igihugu gifite ubukungu bukomeye, ijambo muri dipolomasi mpuzamahanga ndetse n'itangazamakuru rifite uruhare ku rwego rw'Isi.