Urubyiruko rwa CityLight Foursquare Church rwunamiye inzirakaren

Ni igikorwa bakoze ku gicamunsi cyo ku wa Kane tariki ya 1 Gicurasi 2025, aho urubyiruko rusengera muri CityLight Foursquare church rwasuye Urwibutso rwa Jenoside rwa Kigali ruherereye ku Gisozi, bunamira inzirakarengane zazize Jenoside yakorewe Abatutsi, basobanurirwa amateka arambuye y’ishyirwa mu bikorwa rya Jenoside yakorewe Abatutsi, n’uko yahagaritswe.

Bakoze iki gikorwa muri iki gihe cy’iminsi 100, aho u Rwanda n’Isi bibuka ku nshuro ya 31 Jenoside yakorewe Abatutsi yatwaye ubuzima bw’abarenga Miliyoni.

Uru rwibutso ruri mu za mbere zashyizwe ku murage w’isi na UNESCO, rushyinguyemo imibiri irenga 250,000 yavanywe hirya no hino mu bice bitandukanye by’Umujyi wa Kigali, rugatanga ishusho y’ubugome Jenoside yakorewe Abatutsi yateguwe ikanashyirwa mu bikorwa.

Bigirinka Alain uyobora urubyiruko rwa CityLight Foursquare Church Kimironko, yabwiye InyaRwanda ko batekereje iki gikorwa mu rwego rwo kwifatanya n’abandi Banyarwanda muri iyi minsi 100 yo kwibuka abazize Jenoside yakorewe Abatutsi mu 1994.

Yagize ati: “Ni muri urwo rwego rero natwe nyuma yo gusenga, no gusengera imitima y’Abanyarwanda, no gusenga muri ibi bihe twari turimo, twasanze ari ngombwa ko natwe twaza kuri uru Rwibutso rwa Kigali, kugira ngo dusure amateka, twige ibyabaye muri iki gihugu. Benshi muri aba ngaba ni urubyiruko baracyari bato, bamwe bavutse nyuma ya Jenoside abandi bavutse muri biriya bihe, ntabwo babibonye. Ariko ni ngombwa ko babyiga bakamenya amateka yaranze igihugu.”

Bigirinka yakomeje avuga ako abenshi muri uru rubyiruko ari bwo bari bageze kuri uru Rwibutso, aho babashije gusobanukirwa byinshi birenze ku byo bari basanzwe bazi ku mateka yaranze u Rwanda.

Akomoza ku mukoro bahakuye, yagize ati: “Urubyiruko buriya bavuga ko ari imbaraga z’igihugu, imbaraga z’itorero, imbaraga z’aho bari. Izo mbaraga rero, iyo zikoreshejwe nabi zirasenya, ariko iyo zikoreshejwe neza, zirubaka.”

“Twebwe rero nk’urubyiruko, amasomo dukura mu bihe nk’ibi ngibi no mu mateka, ni uko twebwe nk’Abakristo tugomba gukoresha imbaraga zacu twubaka igihugu, mu kubaka ubumwe bw’Abanyarwanda.”

Yavuze ko nubwo ibi ari inshingano z’Abanyarwanda bose, ariko by’umwihariko nk’Abakristo ijambo ry’Imana ribabwira kugira urukundo, bakagira ubumwe, ntibagire ivangura iryo ari ryo ryose. Ati: “Ibyo rero twe turabirenga tukaba intangarugero mu bandi, n’abatari Abakristo tukabereka urugero rwiza.”

Yakomeje agira ati: “Iyo Abakristo baza kuba bari bahagaze neza mu byo bizera, ntekereza ko ubukana Jenoside yagize itari kuba yarabugize. Ariko kubera ko hari Abakristo batahagaze neza mu byo bizera, byatumye bijandika muri biriya.”

Mutoni Faith, umuyobozi w'urubyiruko wungirije muri CityLight Foursquare, yavuze ko ari iby'agaciro kuba barushijeho kumenya amateka yaranze igihugu, 'kuko biradufasha kumenya ibyabaye, uko byateguwe n'uko byagenze kugira ngo Jenoside irangire. Rero nk'urubyiruko umukoro dufite, ni uko intambara y'amasasu yarangiye, twe nk'urubyiruko dufite uruhare runini rwo kurwana n'intambara y'imbuga nkoranyambaga. Dukwiye gufata iya mbere mu kurwanira igihugu cyacu, duhinyuza abahakana n'abapfobya Jenoside yakorewe Abatutsi."

Nyuma yo kubona ko hari Abakristo biciwe mu nsengero no muri Kiliziya, urubyiruko rwa Foursquare rwiyemeje kurushaho kunga ubumwe buri wese atabara mugenzi we umuhungiyeho, bagatanga urugero runyuranye n’iby’Isi ndetse n’amateka mabi u Rwanda rwanyuzemo.

Bahamya ko bize amasomo akomeye abasaba kurushaho gushyira mu bikorwa ibyo biga mu ijambo ry’Imana mu buzima bwabo bwa buri munsi, bigisha abantu kuba umwe, guhuza imbaraga no kutareba ku bibatandukanya ahubwo bakareba ku bibahuza.

Banaboneyeho kandi kugenera ubutumwa urubyiruko bagenzi babo bari hirya no hino mu matorero yo mu Rwanda, bugira buti: “Rimwe na rimwe dutinda cyane mu nsengero ntitwite cyane mu kumenya ibiri hanze y’insengero n’amateka yandi yo hanze, ugasanga umwanya munini tuwushyira mu kuririmba, kumva ijambo ry’Imana, mu gusenga,… Ni byiza cyane ariko n’ibi ni ingenzi. Urubyiruko rw’Abakristo na bo bahaguruke twige amateka kuko twasanze natwe ntidufite ubudahangarwa turangaye twamera nk’abandi bose.

Niyo mpamvu tugomba gushyira imbaraga nyuma yo gusenga cyane, kuvuga ijambo ry’Imana no kuririmba cyane, tukajya tuza tukifatanya n’urundi rubyiruko mu gihugu tukiga amateka, tukaza kwibuka. Turabakangurira kuza gusura Urwibutso bakamenya amateka yaranze igihugu cyacu, kugira ngo birinde ejo n’ejobundi batagwa mu mutego bagenzi bacu b’urubyiruko baguyemo mu 1994.”

CityLight Fousquare Church benshi bazi nka Foursquare Gospel Church Rwanda, ni itorero rya Gikristo rikorera mu Rwanda kuva mu mwaka wa 2005, icyicaro gikuru kiri ku Kimironko mu karere ka Gasabo, rikaba riyobowe na Bishop Prof. Masengo Fidele. Iri Torero rifite amatorero arenga 40 hirya no hino mu gihugu.