Ku munsi w'ejo nibwo hagiye hanze amakuru avuga ko iyi kipe y'Ingabo z'igihugu iri mu biganiro n'abatoza babiri aho igomba gukuramo umwe akaba ariwe isinyisha agasimbura Darko Novic watandukanye nayo mbere y'uko umwaka w'imikino urangira.
Ibyo wamenya kuri abo batoza
Miguel Cardoso: Uyu mutoza amazina ye yose yitwa José Miguel Azevedo Cardoso akaba yaravutse tariki ya 28 z'ukwezi kwa 5 mu 1972 avukiye mu gace ka Trofa muri Portugal.
Mu 1995 ari muri Kaminuza yize ibijyanye n'imyitozo ngororamubiri na siporo by'umwihariko umupira w'amaguru. Mu 1998 Miguel Cardoso yasoje Master’s mu bijyanye n'ubumenyi bwa siporo muri Kaminuza ya Porto. Yatangiye ibijyanye no gutoza mu 1996 aho yahereye mu ikipe ya FC Porto mu batarengeje imyaka 10.
Nyuma yaho yaje kuzamurwa agirwa umutoza ushinzwe kongerera imbaraga abakinnyi mu ikipe ya kabiri mu 1999 naho muri 2003 aza kugirwa umutoza w'abatarangeje imyaka 15. Muri 2004 yaje kwerekeza mu ikipe ya C.F. Os Belenenses yo muri Portugal ari umutoza wongerera imbaraga abakinnyi mu ikipe ya mbere.
Muri 2006 Miguel Cardoso yerekeje muri SC Braga aho naho yari umutoza ushinzwe kongerera imbaraga abakinnyi.Muri 2007 uyu mutoza yerekeje muri Académica de Coimbra nayo yo muri Portugal aho ho noneho yari umutoza w'ungirije.
Muri 2013 yerekeje muri Ukraine mu ikipe ya Shakhtar Donetsk aho yatozaga abatarengeje imyaka 21 ndetse akaba n'ushinzwe guhuza ibikorwa mu makipe y'abato.
Mu mwaka w'imikino wa 2016/2017 yaje kugirwa umutoza w'ungirije mu ikipe ya mbere ya Shakhtar Donetsk aho yari yungirije Paulo Fonseca watoje amakipe akomeye arimo Roma na AC Milan none akaba aheruka guhabwa gutoza Lyon.
Muri 2017 Miguel Cardoso yatandukanye na Shakhtar Donetsk ubundi yerekeza muri Rio Ave yo muri Portugal ayifasha kwitwara neza ubundi muri 2018 yerekeza muri Nantes yo mu Bufaransa asimbuye Claudio Ranieri.
Yaje gutandukana nayo nyuma y'iminsi micye gusa abonye amanota 6 mu mikino 8 yari atoje. Muri uyu mwaka kandi yerekeje muri Celta Vigo aho atayitinzemo nayo kuko yahise yirukanwa.
Muri 2019 yerekeje muri AEK Athens yo mu Bugereki naho avayo yirukanywe. Nyuma y'imyaka ibiri adatoza yasubiye muri Rio Ave yiwabo ubundi aza kuyivamo mu mwaka ushize yerekeza muri Espérance de Tunis yo muri Tunisia.
Ntabwo yahatinze kuko yahise yirukanwa ubundi mu kwezi kwa 12 k'umwaka ushize n'ubundi yerekeza muri Mamelodi Sundowns yo muri Afurika y'Epfo arinayo ari gutoza kugeza ubu gusa hakaba hari amakuru ahari avugwa ko ashobora kwirukanwa nyuma y'uko batsinzwe na Pyramids FC ku mukino wa nyuma wa CAF Champions League.
Amaze gutwara ibikombe bibiri mu buzima bwe bwose aho yatwaranye igikombe cya shampiyona na Espérance de Tunis ndetse na Mamelodi Sundowns.
Nabil Maaloul
Uyu mutoza yavuze tariki ya 25 Ukuboza avukira i Tunis muri Tunisia. Ibijyanye n'umupira w'amaguru yatangiye ari umukinnyi aho yakiniye amakipe arimo Esperance de Tunis,Al-Ahli Saudi Football Club na Club Africain. Yanakiniye ikipe y'igihugu ya Tunisia kuva mu 1982 kugeza mu 1994 aho yakinnye imikino 74 agatsindamo ibitego 11.
Nyuma y'uko aretse ibijyanye no gukina yahise atangira ibijyanye no gutoza ahereye mu ikipe y'iwabo ya Olympique du Kef mu 1997. Muri 2002 yahisemo kujya kungiriza mu ikipe y'Igihugu ya Tunisia aho yanatwaranye nayo igikombe cy'Afurika cya 2004. Ibi ariko yanabifatanya no kuba umutoza Mukuru w'abatarangeje imyaka 23.
Nyuma yaho yahise ajya gutoza Club Africain ari umutoza mukuru gusa naho ntiyaharinda yerekeza muri CA Bizertin nayo yo muri Tunisia. Muri 2006 yasubiye mu ikipe y'Igihugu ya ari umutoza w'ungirije n'ubundi.
Muri 2010 ni bwo ibintu byasaga nkaho bitangiye aho yagiye gutoza Espérance de Tunis ubundi muri 2011 atwarana nayo ibikombe 3 birimo icya shampiyona, icy'igihugu ndetse n'icya CAF Champions League.
Nyuma yaho yahawe gutoza ikipe y'igihugu ya Cape Verde ndetse aza no gusezerera Tunisia mu gushaka itike y'igikombe cy'Isi cya 2014. Yaje gusezera kuri uyu mwanya akomereza mu makipe arimo El Jaish ndetse n'ikipe y'igihugu ya Kowait.
Muri 2017/2018 yongeye gusubira mu ikipe y'Igihugu ya Tunisia ndetse ayifasha kongera gusubira mu gikombe cy'Isi yaherukagamo muri 2006. Nabil Maaloul yahise aba umunya-Tunisia wa kabiri ugiye gutoza mu gikombe cy'Isi nyuma ya Abdelmajid Chetali wari warabikoze mu 1978. Ari kumwe n'ikipe y'igihugu ya Tunisia mu gikombe cy'Isi cya 2018 baviriyemo mu matsinda ndetse ahita yegura kuri izi nshingano.
Yakomereje muri Al-Duhail SC yo muri Qatar aho yayivuyemo ajya gutoza ikipe y'igihugu ya Syria ndetse akaba n'umutoza wa mbere ukomoka muri Tunisia uyitoje. Muri 2021 Nabil Maaloul yerekeje mu ikipe ya Kuwait SC aho yatwaranye nayo igikombe cya shampiyona n'ik'igihugu.
Yayivuyemo muri 2022 asubira muri Espérance de Tunis nyuma y'imyaka 10 gusa ntitayayitindamo ahita asubira muri Kuwait SC aho nayo yatandukanye nayo muri 2024 none kugeza ubu akaba nta kipe afite.
Nabil Maaloul uri kuvugwa mu kujya gutoza APR FC